Pdiang ka KAS ia ka jingithuh Official Language ia ka ktien Khasi | Kwah don bynta ha ka jingshna ia ka Rule

Shillong, Iaiong 29: Ka Khasi Authors Society (KAS) ha ka sngi Baar, kala pdiang ia ka jingshim rai ka kynhun myntri ban pynlong ia ka ktien Khasi kum ka Official Language ka Meghalaya bad ong, ba kane kadei ka “sienjam ban iaid shakhmat’ hynrei kala banjur pat ba dei ban pyntreikam ia ka ym tang ban shu long tang ka shap.

“Ngi ai khublei ia ka sorkar lyngba ka kynhun myntri ban pynlong ia ka Khasi kum ka Official Language jong ka jylla kadei kaei kaei kaba ngi pdiang bad sienjam ban iaid shakhmat na ka bynta jong ka sorkar” ong u President ka KAS u Dr DRL Nonglait haba iakren bad ki nongthoh khubor.

Ula ong, ba kane ka jingai jingithuh kala wan hadien da ki phew snem ba la ioh ia la ka jong ka jylla.

“Ngi iaroh ia ka sorkar kaba la pynurlong ia kane ka jingdawa kaba la slem bha, kadei shisha ka jingdawa kaba baroh kila ap khmih lynti, kadei hadien jong ka 54 snem naduh ba la phiah ia ka Meghalaya na ka Assam, ba ka ktien Khasi kala ioh ia ka jingithuh kum ka Official Language jong ka jylla” ula ong.

“Ngi iaroh ia ki sienjam kiba la shim da ka sorkar hynrei ban pynthikna ba ka ktien Khasi kan treikam kan shong eh ha ka jingshisha ba dei ban pyntreikam pura ia ka ha ka jingthoh bad ha ka kam. Kan hap ban iaid palat ban ia ka jingdon tang ha ka shap” ong u Dr Nonglait.

U President ka KAS ula ong, ba ka seng kadei ban donbynta lang ha ka jingpyniaid shakhmat ia ka kam ban pyntreikam ia ki kyndon aiñ.

“Ha ka jingiakren ka jong ngi bad u Myntri Rangbah ka Jylla bad u Symbud Myntri Rangbah ka Jylla ngi lah kren shai ba ha ka jingpynwandur ia ki kyndon aiñ ban pyntreikam, ka Khasi Authors Society kadei ban iadonbyntalang namar ba ngi don ia ki riewstad kiba lah ban noh synniang ha ka rukom kaban long kaba ryntih bha” ula ong.

“Shisien ba la dep ban pynbeit bha ia ka Ordinance da ka ïingdorbar thawaiñ ka jylla, ka sorkar ka dei ban sdang ban thaw ia ki kyndon aiñ ban peit ia ka jingpyntreikam ia ka ktien Khasi ha ki kam sorkar, kadei ban don ka polisi treikam kaba baroh ki tnad sorkar kidei ban pyndonkam ia ka ktien Khasi haba pynmih ia kino kino ki jingpynbna paitbah, ki hukum bad kano kano ka jingphah ia ki jingthoh ne shithi” ula ong.

Halor ka pule puthi, u Dr Nonglait ula ong, ba dei ban pyniar ia ka ktien Khasi da kaba iaid da ki wat.

“Haba ngi shim ha ka liang ka pule puthi, ka tnad kadei ban shimkhia thikna namar ba mynta ka Khasi kadei ka ‘Medium of Instruction’ bad ka jingthoh eksamin tang haduh ka klas V, kaba mut tang haduh ka Primary,” ula ong.

“Ka jingangnud ka jong ngi, ka long ba ia ka Khasi dei ban pyniar ha ka wat kaba nyngkong haduh ka Klas VIII bad lada pyntreikam ha ka wat bad kumta ha ka wat ka baar, ka sorkar ka lah ban pyniar ia ka Khasi haduh kum ka ‘Medium of Instruction bad Medium of Examination’ haduh ha ka kyrdan jong ka Secondary bad Higher Secondary”.

Ula bynrap ba na ka bynta ka Higher Education kadei ban don ka thong kaban iaid slem bha.

“Lah ban pyntreikam da kaba iaid da ki wat bad ha ki por ban wan, ka long ruh kaba lah ban pyndonkam ia ka Khasi kum ka ‘Medium’ haduh ha ka kyrdan Degree, kumba la leh da kiwei pat ki jylla, nuksa kum ha Assam, ka Assamese bad English baroh ar kidei ki ‘Medium of Instruction bad Examination’ wat hapoh Meghalaya ruh”.

“Ka lah ban shim por hynrei kadei kaba lah pat ban leh ba ia ka Khasi yn pyniar bad ban pyndonkam kum ka ‘Medium of Examination’ ha ka kyrdan jong ka Degree” la ong u Dr Nonglait.