Shillong, Lber 06: Ki sengbhalang ba kynthup ka Khasi Students’ Union (KSU) bad ka Federation of Khasi Jaiñtia and Garo people (FKJGP) hynne ka sngi kila pdiang burom iaka kynhun ialehkai Football jong ka jylla kiba dang wanphai na Saudi Arabia.
Ki sengbhalang bad ki riew paidbah kila ap iaka Meghalaya Football Team ha Mawlai Petrol Pump, Shillong kum shi bynta ban pdiang burom iaka kynhun ka ba la wanrah nam iaka jylla baroh kawei watla ka Meghalaya kala shah rem noh haka Karnataka da 2-3 ha ka phainal.
Watla ka Meghalaya kala rem noh haka phainal jong ka Santosh Trophy hynrei kala thaw ruh iaka Histori namar kane kadei ka sien ba nyngkong baka jylla kala poi haka Phainal.
“Kane ka jingpoi ka Meghalaya shaka phainal jong ka Santosh Trophy ka nang plie lad shuh shuh iaki samla ban nang trei shitom naka bynta ban poi shaka thong bad kumjuh ruh ban pynkhreh naka bynta u snem ban wan” la ong u Coach ka jylla u bah Khlain Pyrkhat Syiemlieh.
U bah Khlain ula ong ba haka jingshisha ka jylla kala pynkhreh bha ban poi shaka thong jong ka Santosh Trophy hynrei kala shah rem noh haka Phainal namar ki rangialehkai ka jylla ki kham khynnah bha ban ia nujor bad kiwei ko rangialehkai jong kiwei ki jylla.
Ula ong ba ki samla kidei ban sngewthuh ba ka jingialehkai football kam dei shuh ka jingialehkai hynrei kadei ka kam ka jam bad kidei ban trei shitom ban poi shaka thong.
