Itanagar, Lber 06: U MLA ka Seng Congress na Arunachal Pradesh ula phah da ka shithi sha u Myntri Rangbahduh (PM) Narendra Modi ha kaba u la kyrpad ia u na ka bynta ban khang pyrshah ia ki CCTV kiba dei napoh China namar ki lah ban pyndonkam kum ki khmat bad ki shkor na ka bynta ka Beijing.
Une u MLA na Pasighat West uba dei ruh u myntri barim ka tnat minority affairs ka sorakr pdeng, u Ninong Ering ula pynpaw iakane ka juh ka mat lyngba ka Twitter ha ka 5 tarik mynta u bnai u la ong, “Nga la thoh ka shithi sha u PM Modi ban kyntu na ka bynta ban khang pyrshah ban pyndonkam ia ki CCTV napoh China hapoh ki ophis jong ka sorkar India.Kine ki CCTV ha baroh ki bynta jong ka ri India ki lah ban pyndonkam kum ki khmat bad ki shkor jong ka Beijing.”
Ha katei ka shithi utei u MLA u la pynpaw ha u PM Modi halor ka jingma ia ki kam shong shngain jong ka ri India namar ki kyndon ain kiba la don lypa bad ka jingpynshai paidbah kim long kiba biang ban tehlakam ia kane ka jingma.
“Ha kane ka jinglong jingman kaba mynta ka China ka la iai bteng ban leh ym tang ia ki kam pynbitar namar ka jingbym lah tehlakam ka jong ngi, hynrei da kaba thombor ruh ia ki jingtreikam kiba iadei bad ka teknologi jong ka ri India, kumta ruh ka long kaba donkam ia ka India bad kan shim ia ki sienjam ban khanglad ia kine ki jingpynsyier jong ka China,” thoh u Ering lyngba katei ka shithi sha u PM Modi kaba don ia ka tarik 5 Lber 2023.
Nalor kata u Ering u la pynpaw ruh ha kaba iadei bad ka jingpyntreikam ia ki Internet Protocol (IP) camera ia kiba ju pyndonkam ha ki CCTV network bad ki internet-operated Digital Video Recording (DVR) device ia kiba lah ban pyndonkam da ki hacker jong ka China.
Shuh shuh u la ong ba kiba bun ki ri kaba kynthup ia ka United States, United Kingdom bad Australia ki la sakhi ia ka jingma kaba don jingiadei lyngba ka jingpyndonkam ia ki tiar ba la pynmih da ka China ha ki CCTV kaba la buh jingma ia ki kam shongshngain jong ka ri.
“Katkum ka jingioh jingkhein da ka sorkar pdeng ka pyni ba ki don haduh kumba 2 million ki CCTV ba la pyndait ha ki bynta bapher bapher jong ka ri India, ha kaba 90 percent na kine ki dei kiba la wan lyngba ki kompeni kiba dei napoh China.
