Thaw їa ka Co-ordination Committee ban dawa Jylla la ka jong
Nongstoiñ, Nohprah 12: Ki nongїalam ka Hill State Peoples Democratic Party (HSPDP) central body ba la їalam da u President bah K.P.Pangñiang President, ki la pdiang burom їa ki nongїalam jong ka Garo National Council ha ka shnong Mawphanlur, hakhmat u mot sah jingkynmaw їa u (L) bah Hopingstone Lyngdoh.
Ïa ka kynhun jong ka GNC la їalam da u bah Augustine Marak General Secretary ka GNC u ba dei ruh u Chief Executive Member (CEM) barim ka Garo Hills Autonomous District Council (GHADC) ha kaba synran lang ruh da ki dkhot jong ka GNC. Ha ka jingїalang la don ryngkat da u kyrtong ka HSPDP na Umsning bad ki nongїalam ba ha khmat, u bah Martle Mukhim MDC ka Mawkynrew, u bah Witting Mawsor bad kiwei kiwei.
Na ka liang ka GNC u bah Agustine Marak u la pynkynmaw ba ka jingdawa ban їoh noh la ka jylla Khasi Jaiñtia State bad ka Garo State, ka dei ka jingdawa kaba la rim bha kaba la saiñ dur da ki arngut ki rangbah kiba la bam kwai ha Dwar u Blei kata u (L) Bah Hopingstone Lyngdoh bad u (L) Clifford Marak bad ka la donkam ban pynkhie im thymmai biang.
U la ong ruh ba ha ka por ba u long kum u CEM ka Garo Hills Autonomous District Council, u la rah їa katei ka mat hapoh ka dorbar jong ka Council bad baroh ki MDC ki la mynjur ha kaba la pass ruh da ka resolution na ka bynta ban phah da ka memorandum sha ka sorkar pdeng.
U la pynkynmaw ba kitei ki nongїalam jong ka HSPDP bad ka GNC ki la ai bun tylli ki dorkhas sha u Myntri Rangbah duh ka ri ban pynsngew halor ka jingdawa Khasi Jaiñtia State katkum ka Article 371 (k) bad їa ka Garo Sate kat kum ka Article 371 (J) jong ka rtiti synshar ka ri. U la ong ruh ba їa ka dorkhas la aiti khatduh ha ka por ba u Manmohan Singh u long u Myntri Rangbah duh ka ri.
U bah K.P.Pangñiang haba їakren bad ki nongthoh khubor, u la ong ba na ka bynta ban pynthymmai biang їa ka jingdawa jylla la ka jong, la thaw biang їa ka Co-ordination Committee hapdeng ka HSPDP bad ka GNC, ha kaba u bah K.P.Pangñiang President ka HSPDP un long u Chairman, u bah Augustine Marak General secretary, u bah Nickman Marak Vice president ka GNC kum u Co Chairman bad ki dkhot ki long u bah Norbin Marak, bah Philip Sangma, bah B.K.Budnah, bah W.Waniang bad bah S.Suting. Nalor kata la thung ruh їa u bah Martle Mukhim kum u nongai ktien na ka liang ka HSPDP bad їa u bah Genesingh A Sangma kum u nongaiktien na ka liang ka Garo region.
Haba kylli pat la ka sorkar India kan kohnguh ne em їa ka jingdawa jong ki, u la ong ba kano kano ka jingdawa ka shim por ban їoh. Hynrei katkum ki dak ki shin ba ka sorkar pdeng ka pynpaw, ka long ba ka kwah ban pynneh pynsah їa ki riti ki dustur ka ktien ka thylliej bad ka jinglong kyrpang, katkum ki jaka ka don ka jingkyrmen ba ha kawei ka sngi kan sa urlong.
U la ong ruh ba lada ka ri Amerika ka don sanphew tylli ki jylla, kam don jingeh їa ka ri India kaba dei ka ri synshar paitbah kaba heh tam ha ka pyrthei, ba kan pynurlong їa ki jingdawa ban thaw jylla thymmai katkum ka ktien ka thylliej bad ka jinglong jingman jong ka synshar ka khaddar, ka riti ka dustur.
Haba kylli pat ha kaba їadei bad u pud u sam jong ka Khasi Jaiñtia bad Garo state bad ruh їa ki jaka bad ki shnong ki thaw ba shong ba sah da ki jaitbynriew Garo kiba hap ha West Khasi Hills, u bah Pangñiang bad u bah Augustine Marak ki la kubur lang ba їa u pud u sam u ba la dep ppruid dak lypa yn ym pynduh hynrei kin neh kumba ka long.
U Marak da kaba shai u la ong ba ki jaitbynriew Garo kim don ym tang hapoh West Khasi Hills, hynrei ha Assam, Bangladesh bad kiwei kiwei ki jylla ha ri India kumta kin sah beit ha ki jaka ba ki la shong la sah baroh shi katta. Ha kajuh ka por u la ong ba ka jingkwah ban їakhlad noh hapdeng ki Khasi Jaiñtia bad Garo, kam dei namar ba ki їa bishni ne ki don kano kano ka jingbym їa sngewthuh jingmut hynrei ka dei namar ba ka don ka jingїapher ha ka ktien ka thylliej, ka riti ka dustur bad ka rukom pynїaid ha kiba bun ki bynta.
Ha kaba їadei bad ka jingleit ban pynlong ka jingїakhih ha Delhi ba la pynlong da ka National Federation of New State (NFNS), kitei ki nongїalam ki la pynshai ba namar katei ka jingїakhih kan sdang la shisngi ka 14 tarik, kiwei pat ki kynhun kiba la їadon lang ha ka shatri jong ka NFNS, ki la nang leit noh da ka rel naduh mynta ka sngi.
