Nongstoiñ, Nohprah 12: Kum shi bynta ban rakhe ïa ka Khristmas, ka seng Hynñiewtrep National Youth Movement- Nongkhlaw, ka la leit ai jingiarap ia ki katto katne ki longïing kiba duna ha ka ïoh ka kot, da kaba ai sngewbha da ki jaiñ kup kiba syaid kum ka jingsngew lem.
Ha katei ka sngi ka seng ka la ïoh ruh ban ot ïa u Cake kum ka dak jong ka jingkmen ha ka jingiadonlang u bah Louis Dohtdong President ka HNYM seng kmie, bah Tailan Star Lyngkhoi President HNYM-WKHD, samla Lapynshai Wanñiang President HNYM-Nongkhlaw, ki riew rangbah jong ka shnong bad kiwei kiwei.
“Kane ka jingleh isynei ka dei kum shi bynta ban ai mynsiem wat haba ki long tang ki jingai kiba rit. Ka jingai sngew lem kam dei kaba pyni paidbah ïa ka jinglah jong ka seng”, ong u Bah Luis.
Ïa katei ka jingïalang kaba lyngkot la pynlong ha dorbar hall ka shnong Nongkhlaw kawei na ki shnong ha ka thaiñ Nongstoiñ West Khasi Hills District.
