Shillong, Jylliew 15 : U Myntri ka Ministry of Ports, Shipping and Waterways Sarbananda Sonowal ha ka sngi Nyngkong ula ong ba ka Meghalaya kala paw mynta kum ka jaka wan kynshew kam kaba hakhmat eh hapoh ka thain Shatei Lam Mihngi, haba shim ia ki jingkylla ka thain na ki jingeh ha ki lad pyniasoh sha ka jaka ba kiew bha ka ioh ka kot, kum kawei na ki khana jingjop ba hehduh ha ka roi ka par hapoh ka jingialam u Myntri Rangbah Duh Narendra Modi.
Haba kren hapoh ka North-East India Infrastructure Summit and Exhibition 2026 ha Shillong, u Sonowal ula ong ba ka jingkiew shakhmat ka Meghalaya ha ka jingdon ki jingtei, ki kam jngohkai, ki lad pyniasoh digital bad ki jingpynkylla ha ka synshar khadar kala buh ia ka Jylla kum ka nuksa ba hakhmat eh jong ka jingkylla ha ka ioh ka kot hapoh ka thain Shatei Lam Mihngi.
“Ka Meghalaya kala pyndonkam hok ia ka spah mariang ba ka don, ki lad ban sengkam sengkam bad ka jingdon ha ka jaka ba biang tam ka ban khring ia ka jingkynshew ha ki kam jngohkai, Information Technology, ka logistice, ka rep ka rwiang bad ka jingpynmih ia ka bording ka bym lah ban pynlut” ong u Myntri.
Haba kren halor ki mat jingpynkylla jong ka Jylla, u Sonowal ula pynpaw ba ka Meghalaya kala ioh ia ka kyrdan kaba lai hapoh ka Ri haba iadei bad ka Compliance Reduction and Deregulation 1.0 hadien b aka pyndep ia baroh 23 tylli ki jing pynkylla kiba hakhmat eh. Ula ainam ia ki prokram ka Jylla kum ka Cherry Blossom Festival, ka jingpynbun ia ki jingtei bad ka jingialam jong u Myntri Rangbah Conrad K Sangma halor ka jingpynkhlain ia ka Jylla kum ka jaka kynshew kam.
U Myntri ula ong ba ka thain Shatei Lam Mihngi kala mad ia ka jingkylla ka bym pat ju jia koit ha kine ki shiphew snem bala leit noh lyngba ki jingkynshew pisa kiba heh ha ka liang ki surok, lynti rel, kad liengsuin, ki kor digital bad kiwei kiwei.
Kat kum ka jingong u Sonowal, ka jingkyrshan mang tyngka na ka bynta ka thain Shatei Lam Mihngi kala kiew na ka T.20,000 klur ha u snem 2014 sha palat T.1.08 lak klur ha u 2025-26, katba ka jingpynlut baroh lang ha ka thain kala tam ia ka T.7.3 lak klur hapdeng kine ki snem.
Ula ong ba jan kumba 10,000 km ki National Highway lah dep ban tei ha kylleng ka thain naduh u snem 2014, katba ka jingdon jong ki kad liengsuin kiba la treikam, kala kiew na ka khyndai sha ka khathynriew. Ka jingpyniasoh mobile network kala poi sha kumba 96% ki shnong ha ka thain Shatei Lam Mihngi, ha kaba palat 40,000 tylli ki Shnong kila iasoh lyngba ka 4G service.
Haba shim ia ka thain Shatei Lam Mihngi kum ka khyrdop ba kongsan bha hapoh ka Act East Policy ka ri India, u Sonowal ula ong ba ka thain kala nang long ka lynti pynpoi mar bad ka khaii ka pateng kaba iasoh bad ki ri ka South Asia bad South East Asia.
“Ka thain Shatei Lam Mihngi kam dei shuh ka thain kaba shah kerkut sawdong. Kala kylla long ka lynti pynpoi par, ka khaii pateng bad ka khyrdop pyniasoh hapdeng ka India bad ki ri ba marjam bad ka Southeast Asia” ula ong.
Kum u Myntri ka Ministry of Ports, Shipping and Waterways, u Sonowal ula iathuh ia ki jingpyrshang kiba dang iaid ban pynlong ia ka Brahmaputra bad ki wah ba don ha Barak Valley kum ki lynti iaid shalan mar napoh Um. U iathuh ba ki project ba shongdor palat ia ka T.1,170 klur kila don mynta hapdeng ka jingpyntreikam ban pynkhlain ia ka khaii ka pateng jong ka thain bad ki ri ka pyrthei lyngba ka duriaw.
U Myntri ula kdew ruh ia ki jingkynshew kam kiba heh ha ka jingseng karkhana, kynthup ka karkhana Tata Semiconductor ba T.27,000 klur ha Jagiroad, Assam, kum ka sakhi ia ka jinglong jingman jong ka thain shatei lammihngi kaba nang kiew ha ka ioh ka kot.
“Ka thain Shatei Lam Mihngi kam dei ka khappud ba khadduh ka ri India. Ka dei ka khyrdop ka ri India sha Southeast Asia bad ka Indo-Pacific” ong u Sonowal.
Hadien kane, u Sonowal ula pyniaid ia ka jingialang CEO Roundtable bala iashimbynta da ki nongialam jong ki kompani kiba dei na ki kam pynmih mar kum ka dewbilat, renewable energy, steel, hospitality, logistic bad kiwei kiwei, kaba la iakren ruh ia ki lad sengkam hapoh ka thain Shatei Lam Mihngi.
