Shillong, Nailar 25: U Bah Banteidor Lyngdoh, Myntri ba dei khmih ia ka tnad kam rep ka Sorkar Jylla u la pan jingkyrshan na ka Sorkar India ba kan theh ia ki lad jingïarap sha ki nongrep ka Jylla.
Ia kane u Bah Banteidor u la pynpaw ha ka jingiakynduh bad u Myntri Sorkar India ba dei khmih ia ka tnad kam rep, u Narendra Singh Tomar ha ka 25 tarik u Nailar, 2022 ha Delhi.
Ha kane ka jingleit iakynduh, u Bah Banteidor u la pynsngew ruh ia ka rai ba ki nongrep ka Jylla ki donkam ia ka dawai sboh na ka bynta ki jingthung jingrep jong ki katkum ka Office Order ka tnad kam rep ka Sorkar Jylla kaba la pynmih ha ka 09 tarik u Nailar, 2022.
U Bah Banteidor ha ka 23 tarik u Nailar, 2022 u la ïakynduh ruh ia u Myntri Khynnah ba dei khmih ia ka tnad Chemical and Fertilizers ka Sorkar India, u Bhagwant Khuba ha kaba u la iakren ban pyllait noh ia ka bhah sboh dawai sha ki nongrep ka Jylla.
Kane ka jingleit ïakren u Myntri sha ki bor bahalor ka Sorkar India sha Delhi ka long tang shi sngi u la kular ha khmat ki nongrep bad ki nongïalam shnong ha ka jingialang pynshai bad pyntip paidbah halor ka jingailad ban pyndonkam dawai sboh biang ha ka Jylla kaba la long ha Mawkatheiñ.
Ka tnad kam rep ka Sorkar Jylla ka la pynmih ia ka Office Order ba ki nongrep kin ioh biang ia ka lad pyndonkam dawai sboh kum ka Urea, DAP, MOP bad SSP hadien 8 snem naduh ba ka Sorkar Jylla barim ka la pynsangeh ia ka subsidy na ka bynta ki dawai sboh sha ki nongrep ha ka 12 tarik u Jylliew, 2014 khnang ban pynduna ia ka jingktah ki dawai sboh ia ka koit ka khiah ia ki nongshong shnong.
Ka jingwanrah ia ka office order ban shah pyndonkam dawai sboh kan long ha ki katto katne ki jaka rep namar la ïohi ia ka jingdonkam na ka bynta ki mar rep kum u phan, sohsaw, u kubi, u phul bad kiwei kiba ju rep kynrei ha ka Jylla.
“Nga la ïoh ban ïakren bad kyrpad ia u Myntri ban theh ki lad jingïarap sha ki nongrep ka Jylla”, la ong u Bah Banteidor uba dang don ha Delhi ryngkat ki nongialam ka Hill Farmers’ Union.
U la pynpaw ba ha ka jingiakren u la ban jur bha halor ka jingrep ryngkat ka dawai sboh ha ka Jylla namar ki paidbah nongrep kim lah ban pynmih ia ki mar rep ban pynim ia ki .
“U Myntri Sorkar India u la khot lang ia ki ophisar baheh ka tnad kam ha kaba ki la shim khia bha ia ki jingpynsngew na ka liang jong ngi ka Jylla Meghalaya”, u la ong.
Ha kawei pat ka liang, u Bah Banteidor u la ong ba jingrep khlem da pyndonkam dawai sboh ruh dei ban pynshlur ia ki nongrep bad ki nongrep kim dei ban shu pyndonkam pathar palat ia ka dawai sboh.
