Shillong, Nailar 10 : U Myntri Rangbah ka Jylla Conrad K Sangma ha ka sngi Nyngkong, ula iakynduh ia ka Myntri Pla Tyngka ka Ri Nirmala Sitharaman bad Myntri Kynnah ka Ayush Prataprao Jadhav ha New Delhi ban iakren ia ka jingbei tyngka ia ki jingtei ka koit ka khiah ha Jylla.
Haba thoh ha X, u Conrad ula pyntip ba ka jingiakynduh bad ka Sitharaman ka long kaba sngewtynnad bad ba tei bha.
Ula pynsngew ia artylli ki kam kiba kongsan : u pud ban shim ia ki Externally Aided Project na ka bynta ki Jylla ka thain Shatei Lam Mihngi bad shah ia ki Jylla ba kin pynneh ia ka excharge rate ba ioh na ki EAP ba dang treikam mynta.
“Sngewnguh ia ka jingshah skhor jong ka bad ka jingbteng ban kyrshan ia ka Meghalaya bad ki jylla Shatei Lam Mihngi” ula thoh.
Hadien kane, u Myntri Rangbah ula iakynduh Prataprao Jadhav ban iakren halor ka jingpynheh ia ka North Eastern Institute of Ayurveda and Homoeopathy ha Shillong.
Ula ong ba ka jingpynheh kan iarap ban pynlong ia ka Meghalaya kum ka regional hub ia ka pule dangle halor ka AYUSH, jingwad bniah bad jingsumar, bad kyntu ia u Myntri ba un pynkloi noh ia ki kam.
