Shillong, Risaw 29: Palat 200 ngut ki samla kila applai ban ioh ia ka rung klas ha ka PA Sangma International Medical College & Hospital jong ka University of Science & Technology, Meghalaya (USTM), kaba dei ka Medical College kaban yngkong eh ha ka jylla ban pyniaid da ki riewshimet.
Katkum ka notice kba la pynmih da ka Tnad Health & Family Welfare, ka Online Mop-Up & Stray Vacancy Round na ka bynta ka Meghalaya State NEET UG 2024 Counselling ha ka PA Sangma International Medical College & Hospital, Baridua, lyngba ka bhah jong ka State Quota, Management Quota bad NRI Quota kala sdang ha ka 28 tarik u Risaw ha ka por 4 baje janmiet bad kan bteng haduh ka por 5 baje janmiet jongka 29 tarik u Naiwieng.
Haba iakren bad ki nongpathai khubor, ka Myntri ka Koit ka Khiah ka Kong Ampareen Lyngdoh kala ong, “Haduh mynta kila don 200 ngut ki kisamla kiba la applai ban ioh iaka jaka pule”.
Na ki 150 tylli ki seat, 23 tylli ki dei na ka bynta NRI Quota, 64 tylli kidei ka State Quota bad 63 tylli ia ka Management Quota.
Ha kaba iadei bad ka jingpynsngew halor ka jingrem palat ka dor jong ka bai pule kaba la buh da ki nongpyniaid jong ka college na ka bynta ka State Quota ia kaba la buh ba ka dei ban long T.4,95,000 shi snem bad T.24,75,000 ia ka jingpule baroh kawei, ka Kong Ampareen Lyngdoh kala ong ba katei ka dor ka dei kaba la mynjur ha ka jingialang kaba la long dang shen.
“Ha kaba iadei bad ka USTM, ia ka dor jong ka bai pule la dep ban ia mynjur ha ka jingialang kaba la long lang bad baroh kiba iadonbynta bad katei ka medical college. Kumta ha ka medical college kaba la pyniaid da ki riewshimet ka long kaba lah ban leh. Ka dei kaba shah, kumta ki ioh ban leh kumtei bad ka National Medical Council (NMC) kaba khmih bniah ia baroh kiei kiei, kala ai iaka jingmynjur. Kumta ban ong ba 4 lak shiteng ka long kaba heh, ka lah ban dei ruh ka bym shisha” kala ong.
“Kumba nga ong, u Myntri Rangbah ula tip halor kane ka jinglong jingman. Mynta yn sa shong bishar hadien ba ula kylluid por bad yn sa khmih bniah bad yn sa shim ia ka rai la ngin ai jingiarap ne em ia ki samla pule kiba leit pule” la pynthikna ka Myntri sorkar.
Kala ong, ba ka bai pule ka iapher na kawei ka jylla sha kawei pat hynrei ka don pat ka Scholarship kaban iarap ia katei ka jingsiew baroh. Ki don ki khep ba ki hap ban siew hynrei kaba bun hi ka jingsiew ka dei kaba siew lyngba ka jingbei tyngka ka sorkar hynrei kan bha shibun ba u Myntri Rangbah yn kren hi halor katei ka bynta.
Kala pynshai ruh baia ka jingjied ia ki samla pule yn pynshong nongrim katkum ka NEET bad ka Reservation Policy.
“Ka USTM ka tyrwa (46 seat) ia ka jylla Meghalaya bad ngin iaid shakhmat ban pyniaid ia ki kam ki jam baroh. Na kitei, 25 tylli kin dei kiba la bei tyngka lut baroh da ka sorkar hynrei kiba sah pat kin hap ban siew hi shiteng ia ka jingsiew kaba ki dei ban siew sha ki bor pyniaid” kala ong.
Ka Myntri kala pyntip ruh ba ka Ordinance kab dang shu dep mynjur da ka kynhun myntri na ka bynta ban treikam ka Private Medical College ka dang sah teng ban ioh ia ka jingmynjur na u Lat ka jylla.
Kala ong, ba ka long kaba kongsan bha ba kane ka jaka pule kan ioh jingbit noh namar ba ki samla pule ki dang wad ia ki jaka pule bad kumta kila bud ia baroh ki kyndon jong ka aiñ bad kan ym don kano kano kaban long shabar ka aiñ. Kaei kaba dei ban leh yn sa leh na ka bynta ban pyndep ia ka thong ban sdang ia ka medical college katkum ka por kaba la buh da ka NMC ia baroh ki jaka pule medical ba kidei ban treikam bad yn hap ban pynsted ia ki kam ki jam baroh.
“Kam don kano kano ka jingartatien ba ngi kwah ban leh kloi bad ngi kwah ban poi noh sha kaban sdang noh ia kane ka medical college, lada phi kwah ban pyndep dei ban bud ia ki kyndon baroh. Ia kitei ki kyndon lah bud bad ngi don ruh ia ka por kaba la buh bad ban sdang noh ia ki klas ha ka por kaba dei kumba la kdew da ka NMC. Ngi dang ap ban ioh iaka jingmynjur ia ka Ordinancebad ngi hap ban pyndep ia katei ka kam hashwa ka por kaba la buh da ka NMC. Kumta ailad ia ngi ban pyniaid noh shakhmat ia ki kam baroh khnang ba ngin ieng ban iohnong bad ba ki samla pule kin don ha ka jinglong jingman kaba jop” la pynkut ka Myntri Sorkar.
