Tura, Jymmang 07: Ki samla pule kiba la wan poi suk sha la iing na ka huri hura bad ka jingiakynad Jaidbynriew ha Manipur, kila iathuh ia ka jingitriem ka jingkulmar bad jingiaumsnam ha katei ka Jylla haba pynpaw “Ngim pat ju iohi bad pat ju mad ia kum kane ka jingjia mynshuwa….Ngi da kmen palat ba ngi la poi suk sha ka Iing”..khublei ia ka Sorkar Jylla khamtam ia u Myntri Rangbah Conrad K Sangma.
Da ki phew ngut ki samla pule na Meghalaya kiba la wan poi iing kila sngew shngain bad sngew laitksuid hadien ka jingshimkhia jong ka Sorkar Jylla ban wan ialam noh ia baroh ki Nong Meghalaya da ki liengsuin kaba dang iai bteng haduh mynta mynne.
Napdeng ka Kynhun ba nyngkong jong ki samla pule bala wan ialam da ka liengsuin ha ka 5 tarik Jymmang na Imphal sha Guwahati bad shala iing ha Tura, ka samla Ajakchera G Mimin haba iakren bad u Nongthoh khubor hynnin ka miet sngi Saitjain, kala iathuh khana ba kumno ki samla pule kila shong iarieh hala ki kamra hostel hashuwa ba ki shipai Indian Army kin wan poi bad ialam ia ki sha ka jaka ba shngain ha Imphal Airport bad ban kyntiew ia ki ha ka liengsuin ban wan iing.
Ka Ajakchera ka dei kawei na ki phew ngut ki samla pule na Meghalaya ia kiba la pynmih hapdeng ka jingshngain na Imphal ha ki kynta ba dang treikam ka korphiw.
Kane ka samla kaba pule 3rd year ha Agriculture University ha Imphal, ka Ajakchera kala iathuh khana ba kumno ka jingkulmar kala iaid na kaba sdang sha kaba ishyrkhei, kaba la pynkhuslai ia baroh.
“Haba nyngkong, ngim shim poi pyrkhat ba ka jingkulmar kan heh haba ngi iohsngew ia ki jingjia ha ka sngi ba nyngkong. Ka dei ha ka por janmiet ba ngi ioh khubor na ki bor pyniaid hostel ba kyntu ia ngin ban shong beit hapoh kamra namar ba ka jingkulmar kala saphriang. Ngi la rit mynsiem ban mih na ka hostel hadien ba ngi iohsngew ia ka jingsiat suloi bad ngi la iohi na jngai ia ka jingher ki kuli ba mih ding ha ka por mynmiet” ong ka Ajakchera.
Kane ka samla haba nyngkong kala kyrmen skhem ba ka jingkulmar kan jem noh bad kiei kiei baroh kin sa long kumba ju long baroh shikatta “Hynrei ha ka miet baa r, ngi la ioh shuh shuh ia ki khubor ba ka jingkulmar kala nang heh. Ngi la nang kuslao hadien ba ioh ia ka khubor ba ki don ki briew kiba la rung sha phyllaw ka Manipur University. Ngim pat ju mad ia kum kane ka jinglong jingman bad ngim khlem nang shuh ban thiah ha ka por mynmiet” kala batai.
Kat kum ka jingong ka jong ka, ka dei ka jingiatreilang jong baroh kiba don hapoh ka lama jong ka Meghalaya Association ba ki kam kila iaid ha ka lynti kaba dei.
“Ki para samla pule lyngba ka Meghalaya Association, kila phone ia ki Heh Sorkar ha Meghalaya bad ma ki ruh kila phone ia ngi ban ia ai jingtip ia kaei kaei kaba jia bad ki sienjam bala shim ban wan shaw noh ia ngi bad ka dei ha ka sngi kaba lai jong ka jingkulmar ba ngi la lah ban mih noh na kane ka Nongbah” kala ong.
Ka jingot sa ia ka kor intermet ban tehlakam ia ka huri hura ruh kala ktah jur ia kito kiba donkam jingiarap. Ki samla pule jong ki University kim shym la lah ban iakren bad ki bor khmih. Khublei ia ka jingtreikam ka wifi bala pyndait hapoh ka campus kaba lah ban pynsngew im ia baroh ki samla pule kiba hap shong setkut ha ki kamra hostel.
Ka ong ba ka jingiohi ia ki shipai Indian Army kiba wan poi ha phyllaw ka University da 4 tylli ki trok myn ha ka sngi thohdieng ban pynmih noh ia ki, ka dei ka dak ba sngew ioh mynsiem ia ngi baroh.
Ki Nonghikai kiba la iadon ryngkat bad ki samla pule ruh kila iarap shibun eh na ka bynta ka jingpynmih suk ia ki samla kiba la hap iaid na ki surok ba thylli ban poi sha airport.
“Watla ngi la sngew shngain ba don lang ki shipai kiba synran ia ngi, hynrei ka jingtieng ka don beit namar ngi hap ban iaid lyngba ki surok thylli kiba dap da ki kali kiba shah wiang ding bad wat ki iing kiba shah pynpra. Ngi sngew lait im mar syn mih ka liengsuin ban wan sha Guwahati” kala ong.
Ki samla pule kila iaroh jur ia ka Sorkar Jylla halor ka jingkloi ban ai jingiarap ia ki samla pule bad ki nong Meghalaya kiba sahkut ha Manipur.
“Ka Sorkar kala shimkhia bha ia ka jingkyrpad jongngi. Ngi da kmen palat halor kane ka jingshimkhia. Ym tang katta, ka Sorkar kala pynthikna ruh ba ngin ym mad ia kano kano ka jingeh ha lynti. Naduh ki jingbam ha airport haduh ka bam ka dih ha surok haduh ki bos ba sngew aram bha ban pynpoi iing ia ngi” ong ka Ajakchera Momin.
Pule lang ia kane: Wan pynpoi suk ka Sorkar ia 66 ngut ki Samla Pule ka Jylla na Manipur ha Guwahati Airport
