Shillong, Lber 06 : U National President ka National People’s Party (NPP) Conrad K Sangma, hynne ka sngi ula ong ba um ju kwah satia ban shu pyndonkam bad bret noh hadien bala dep kam, iala ki jong ki paralok ba iatreilang.
U Conrad ula kren ia kane halor ka jingkylli ia ka rai ba u shim ban kyrpad ia ka United Democratic Party (UDP) bad ka People’s Democratic Front (PDF) ban kyrshan ia ka Sorkar ba ialam da ka NPP.
“Ka shong ha ka jinglong bad ka nongrim jong nga. Nga la kren shai ba kam ju kwah ban shu pyndonkam bad bret noh tang namar ba ngi la don ia u nombor bad ba ngim donkam shuh iano iano ruh. Nga tharai kam long kaba bha na ka bynta ka roi ka par bad ka jingshaniah. Ta ka daw ngi la don 32 ngut hynrei nga la kren hi dalade ia ka UDP bad ka PDF , kam dei satia ba ki phone ia nga ne da kumwei pat” ong u Conrad.
U Conrad ula bynrap “Nga tip ba ngi la don u nombor hynrei namar ka nongrim ba nga ieng, nga kwah ban khot lang ia baroh kiba la iatreilang bad ban ia iaid lang ha ka lynti kat kaba long. Ngi la don shibun ki jingtynjuh bad ngi la ienglang bad ngam klet ia kine kiei kiei baroh. Namar kata, nga kwah ban pyni ba ngi la iatreilang kum ka kynhun ha ki snem bala leit bad ngin leh biang hadien habud ruh”.
Ka Sorkar ba ialam da ka NPP kala ioh ia ka jingkyrshan jong 45 ngut ki MLA ba kynthup ia 26 ngut na ka NPP, 11-UDP, 2-BJP, 2-HSPDP, 2-PDF, bad 2 ngut ki MLA shimet.
Haba kren halor ka MDA-2 kum ka jhad kaba heh, u Conrad ula ong “Nga kmen bha ba ka kynhun barim kala wan phai biang. Ka dei ka khubor ba bha kaba nyngkong eh ba ngin ai sha baroh bad ngim dei kata ka party lane ngam dei uta u briew uba nang tang ban shu pyndonkam ia ki briew ha ka por ba donkam bad ym donkam shuh ha kiwei pat ki por. Nga lah ban nym lah ban leh ia baroh ki kam na ka bynta baroh hynrei ngan pynthikna ba ngin lah ban iatreilang kumba ngi la leh ha ki snem bala leit noh wat hapdeng shibun ki jingtynjuh”.
U Conrad ula ong ba ki don shibun ki jingbym iasngewthuh jingmut ha ka por eekshon hynrei kam dei pat kaei kaei kabym lah ban iapynbeit.
“Namar kata, to ngin ia sdang da ka lynti kaba dei. To ngin klet noh ia kiei kiei baroh, ki don shibun ki kam ba ngi hap ban leh. Ka elekshon kala kut, u paidbah ula dep ban ai ia ka rai. To ngin ia iakhun ia baroh ki jingeh” ula bynrap.
U Conrad u ban sa bam smai lashai ka sngi kum u Myntri Rangbah ka Jylla, ua kyrpad ia baroh ki Political Party ba kin ai ka jingiatreilang.
“Nga kyrpad ia baroh ki Political party ha kane ka por ba ka elekshon kala kut bad mynta ngi donkam ban jam shakhmat da ki kam ba shisha kiba ap hakhmat jong ngi” ula ong.
Halor ka jingdawa ia u Myntri Rangbah na Ri-lum Khasi, u Conrad ua ong ba ha ka riti synshar paidbah, ia u Nongialam la jied da ki MA bad kam shong satia u dei na ka Jaidbynriew aiu.
