Jer kyrteng ia ka Kynhun Synrop da ka MDA-2.0
Shillong, Lber 06 : U Myntri Rangbah ban long ka Jylla Conrad K Sangma, hynne ka sngi nyngkong, ula sam ia ka bhah Myntri Sorkar sha ki paralok ba iatreilang haba jer kyrteng ruh ia ka kynhun synrop ba thymmai kum ka Meghalaya Democratic Alliance -2.0 (MDA-II).
U Conrad u ban sa bam smai kum u Myntri Rangbah ka Jylla lashai ka sngi ka 7 tarik Lber, ula pyntip ba na ki 12 ngut ki Myntri Sorkar, 8 ngut kin dei na ka National People’s Party (NPP), 2 ngut kin dei na ka United Democratic Party (UDP), 1 na ka Bharatiya Janata Party (BJP) bad 1 na ka Hill State People’s Democratic Party (HSPDP).
Ka People’s Democratic Front (PDF) kaba don 2 ngut ki MLA lem bad ki MLA shimet, kim shym la ioh bhah satia ha kane ka jingsam shuki jong u Conrad K Sangma.
Kane ka rai kala mih na ka jingialang jong ki Nongialam kine ki seng sain pyrthei, ka ba long ha Iingsah u Conrad.
Haba iakren bad ki lad pathai khubor, u Conrad ula pyntip ba ka jingialang kala rai ba ia ka kynhun synrop yn jer kyrteng da ka MDA-2 namar ka kynhun ka kynthup ia kijuh ki party ba iatreilang ha ka MDA-1.
U pyntip ba ka kynhun kala rai ruh ban jied ia u (Conrad) kum u Chairperson jong kane ka kynhun.
Haba phai sha ka kynhun ki Myntri Sorkar, u Conrad u pyntip ba ka jingialang kala rai ba 4 ngut na kine ki Myntri Sorkar kin dei na Ri-lum Garo bad 8 ngut kin dei na Ri-lum Khasi bad Jaintia.
Ha kajuh ka por, u Conrad u pyntip ba ka National People’s Party (NPP) kaa tyrwa ia ka kyrteng jong u kyrtong ban iakhun ia ka elekshon Lamphang (Speaker) ka Iingdorbar Thaw Ain, bad kala ieh ha u (Conrad) ban iakren ia ki paralok kiba iatreilang bad hadien bala mynjur lang, ngin sa pynbna ia ka kyrteng jong u kyrtong.
Haba kylli, u Conrad ula kyntait ban jer kyrteng ia ki briew ki ban shimti ia ka shuki Myntri haba ong “Ngin sa iathuh shibit janmiet hadien ba ngi la dep pynthikna bha bad sa pyntip sha phi”.
Kumjuh ruh ia ka jingsam bhah dohkyndang sha ki Myntri bad ki Party, u Conrad ula ong “Ngin ap shuwa ia ka jingpynbam smai ia ki Myntri bad ngin sa pynbna”.
