Nongpoh, Nailur 20: Ka Naional People’s Party (NPP) kala nang ioh mynsiem mynta ba kan lah pynneh halade ia ka shuki MLA jong ka Mawhati Constituency ha ka elekshon MLA-2023 hadien ka jingwan pyniasoh jong ki Nongialam bad ki Nongkitkam jong ka United Democratic Party (UDP) bad ka Indian National Congress (INC).
Ka Mawhati Constituency ka dei kaba la mihkhmat da u Nongialam ka NPP Bah Dasakhiat Lamare uba bat ruh ia ka shuki Myntri ha ka Sorkar Jylla hynrei une u Nongmihkhmat ula rai ban mih noh na kane ka Constituency bad ban leit iakhun pat na Nongkrem Constituency ha ka elekshon MLA ban wan. Ka NPP mynta kala sei bujli mynta da u Bah Shemphang Lyngdoh.
Ki Nongialam bad ki Nongkyrshan jong ka seng UDP bad Congress kiba don da ki spah ngut kila leit ban pyniasoh ialade sha ka NPP ban ai ka jingkyrshan ba pura ia u Bah Shemphang Lyngdoh.
Ia kine ki Nongialam bad Nongkyrshan la pdiang sngewbha da u President ka NPP-Mawhati Constituency Bah RM Mukhim ha ka jingialang ba long hynne ka sngi ba-ar, ha ka jingiadonlang u Bah Shemphang Lyngdoh, Bah Otril Pamshong, MDC barim ka Mawhati nalor kiwei kiwei ki nongïalam ka NPP na Mawhati.
Haba pynshai ia kane ka jingwan pyniasoh, kine ki Nongialam kila pynpaw ba ka jingmih jong ki na la ki jong ki Party ban leit kyrshan ia ka NPP ka long eh namar ka jingiohi ba kane ka Party (NPP) ka don shisha ia ka jingthrang ban shakri ia u paidbah ia kaba la sakhi ruh lyngba ka jingurlong ka jingphohsniew u paidbah haba iadei bad ka surok na Umsning sha Sonidan bad kiwei kiwei ki kam pynroi bala wanrah ha ka thain da ka sorkar ba mynta.
U President ka NPP-Mawhati Bah RM Mukhim haba pdiang ia kine ki dkhot thymmai, ula pynpaw ia ka jingkmen ia ka jingwan iasnohkti lang jong ki ban iakyrshan ia ka NPP ha ka elekshon MLA-2023 bad ban iatreilang ruh ha kaba pynthikna ba u kyrtong ka party un ioh ia ka jingjop ba don burom ha kane ka elekshon.
“Kum ka party hi kan nym kynran dien satia ban ïai trei bad shakri ïa u paidbah ka Mawhati Konstituensi watla don bun ki jingshah kren shah kynthoh na kiba bun ki liang” ula ong haba bynrap “Ki kam pynroi bala wanrah da kane ka Sorkar ba ialam da ka NPP ka dei ka jubab jong ka party iakine ki jingkynthoh baroh”.
