Shillong, Nailur 20 : Ka Hynniewtrep Youth Council (HYC) hynne ka sngi ba-ar, kala dawa ia ka Sorkar Meghalaya Democratic Alliance (MDA) ba kan pyndam noh ia ka Meghalaya Regulation of Gaming Act bad ka Rules bad ruh ban sangeh shisyndon ha kaban pynsyrwa ia ka pisa u paidbah da kaba weng noh ia u Chairman bad ki Dkhot jong ka Gaming Commission.
“Ngi dawa ia ka Sorkar Jylla ban pyndam noh ia kane ka Act bad ka Rules bad ruh ban nym pynsyrwa ia ka pisa u paidbah da kaba siew tulop ia u Chairman bad ki Dkhot ka Gaming Commission da kaba weng noh ia ki. Dei ruh ban pynduh noh ia ki Laisen ba shipor bala dei ai bad ban pynmih ia ka jingpynbna ha ki rynsan paidbah” ong ka HYC ha ka shithi sha u Myntri Rangbah ka Jylla Conrad Kongkal Sangma.
Ha kajuh ka por, kane ka Seng kala dawa ia ka Sorkar Jylla ban nang pynkhlain shuh shuh ia ka ain ba iadei bad ka jing khang ia ki kam khalai la ka dei ka khalai online ne offline hapoh ka Jylla.
Ka HYC ka kynnoh ba ka Tnad Taxation khlem da ioh jingmynjur jong ka Cabinet, kala thaw ia ka Search Committee, thung ia u Chairman bad ki Expert Committee jong ka Gaming Commissiom, kaba long pyrshah ia ka kyndon 27 jong ka Act bad ka Rule 14 jong ka Rule.
Kane ka Seng ka ong ba kane ka jingpynkhein ain ka Tnad Taxation kala paw lyngba ka jubab ia ka RTI bala aiti da u PIO, Commissioner of Tax myn ha ka 17 tarik Nailar.
Ka HYC kala ong ruh ba kam pdiang satia ia ka jingkren u Myntri Rangbah ka Jylla ba ka jingithuh ia ka kam khalai da ka ain kan kyntiew ia ka jingioh lum khajna jong ka Jylla sha ka T.500-600 klur manla u snem.
