Tura, Jymmang 22 : Ka Director General of Police (DGP) Kong Idashisha Nongrang ha ka sngi Palei, kala pynpaw ia ka jing sngewkhia halor ka jingnang kynrei ki kam ba iadei bad u droks ha ri-lum Garo, haba ban jur ia ka jingdonkam ban pynkhlain ia ka jingtehlakam bad jingtuklar ha ka por kaba biang ban khanglad ia ka jingeh ba kan nang heh shuh shuh ha ka thain.
Haba kren sha ki lad pathai khubor, ka kong Nongrang kala ong ba ki borkhmih kila peit pyrman bha ia ka jingkiew ki kam droks hapoh ka thain Sepngi ka Meghalaya bad ngeit ba ka dei kaba dang lah ban tehlakam lada pynkhlain noh mynta ia ki lad ki lynti kiba treikam bha.
“Watla kala don ka jingkiew ha ki kam kiba iadei bad u droks, lada ngi lah ban peitbniah mynta, ngi dang lah ban tehlakam” ong ka DGP.
Kala pynpaw ba ki District Anti Narcotics Task Force (ANTF) ki dei kiba shim ia ka jingkitkhlieh ban iakhun ia ka jingpyniaid iew ia u droks ha Meghalaya. Hynrei, kala kubur ba ka District ANTF ha Tura kam shym la treikam bha kumba long kiwei ki Unit bad ong ki jingpyrshang kila iaid shakhmat ban pynkhlain ia ki jingkhynra.
Ka DGP kala maham pyrshah ban ailad ia ka ri-lum Garo ba kan mad ia kajuh ka jinglong jingman kumba la mad ha ki thain Mihngi ka Meghalaya ha kine ki snem bala leit.
“Ngi thikna ba ngim kwah ba kaei kaba jia ha ka Eastern Range (Khasi-Jaintia) kan jia lang ha ka Western Range (ri-lum Garo) haba phai sha u droks” kala ong.
Ka kong Nongrang kala kdew ba ka Meghalaya, kaba ju iapeit baroh kum ka lynti iaid jong u droks ha ki snem bala leit noh, mynta kala sakhi ia ka jingnang bun ki nongdih droks, ka rukom long kaba long ka jingsngewkhia kaba khraw.
Kat kum ka jingong jong ka, u droks bala ioh kurup na ri-lum Garo uba bun hi u dei uba wan na kiwei pat ki bynta jong ka Ri bad rung lyngba ka Assam ym lyngba ka Bangladesh.
“Kaei kaba wan sha ri-lum Garo na Bangladesh ka dei kaba duna eh haba ia nujor bad kaei kaba wan na kiwei pat ki bynta jong ka Ri” kala ong.
 Kong Idashisha Nongrang ha ka sngi Palei, kala pynpaw ia ka jing sngewkhia halor ka jingnang kynrei ki kam ba iadei bad u droks ha ri-lum Garo, haba ban jur ia ka jingdonkam ban pynkhlain ia ka jingtehlakam bad jingtuklar ha ka por kaba biang ban khanglad ia ka jingeh ba kan nang heh shuh shuh ha ka thain.){kind=link}