Shillong, Jymmang 21 : Ka Iingkashari Meghalaya High Court ha ka sngi Palei, kala pynkynriah ia ka jingtian bishar ia ka ujor kam bymman bala mudui da ka Sorkar pyrshah ia ka Sonam Raghuvanshi, ka nongshah kynnoh ba hakhmat eh ha ka jingpyniap iala u kurim ha Sohra, u Raja Raghuvanshi, sha ka 1 tarik Jylliew.
Ia kane ka hukum la pynmih da ka Iingkashari u Justice W Diengdoh hadien ba shong bishar ia ka jingkyrpad bala buh hakhmat da u S Thapa, u nongiasaid jong ka nongshah mudui.
“Halor ka jingkyrpad u S Thapa, nongiasaid jong ka nongshah mudui, buh noh ia kane kakam ha ka 01.06.2026” ong ka hukum.
Ha u bnai bala lah, ka IIngkashari Magistrate kala ai jamin ia ka Sonam hadien ba rai ba ki Pulit kim shym la lah ban ai jingtip bha halor ki nongrim ka jingkem ia ka Sonam.
