Shillong, Jymmang 21 : Ka Nangkiew Irat FC ka la pyllait lut ia baroh ki ktang lyer bad lah pynliem thiaw ia ka Langsning FC da 3-1, ha ka wat iakhun second leg ka quaterfinal jong ka 5th Meghalaya State League, ba long hynne ka janmiet ha madan ialehkai ka SSA Stadium, First Ground Polo.
U Coach ka Langsning FC bah Khlain Pyrkhat Syiemlieh, u la pynshong ben ia ki rang ialehkai ba kynsai jong ka kynhun haba sdang, hynrei, marsien iohi ia ka rukom ialehkai ka Nangkiew Irat FC, wut wut u la phah pynsyiad met (warm-up) bad bujli ia ki player ka dang iai bteng wat haduh ba la iakhun ia ka kylla miet. Hynrei kane ka buit kam shim la lah ban thaw lad eiei ban lait na ka nam rem.
U namtam ha kane ka jingiakhun u dei u Wallamsuk Nongkhlaw uba la ioh the par kol ha ka minit ba 25 bad 50 bad la bynrap s aka kol u Justerwell Tham ha ka minit ba 81. Ia ka kol ka Langsning la ioh ban thep da u Kyrmenskhem Mukhim (42′).
Kumban shu pynkynmaw, ha ka wat ba nyngkong ka Langsning FC ka la pynliem da 6-1 ia ka ia ka Nangkiew Irat FC
Ha shwa jong kane ka jingiakhun, ka Rymbai Shkenshynriah kala pynliem ia ka Maram FC da 6-2 kol.
Ki lai kol u Iaishah Bareh (3′, 52′, 75′) bad bynrap lang sa ki kol na u Hesmiki Rymbai (19′, 90’+5), u Niponghi Sumer (20′) ka la biang pura ia ka kynhun ialehkai ka Rymbai Shkenshynriah SC ban pynliem ia ka Maram FC.
Ia ki artylli ki kol naka bynta ka Maram FC la thep ia ki da u Seiborlang Tado (53′) bad Santosh Teron (77′).
Haba phai sha kane ka jingiakhun, tang hapoh 20 minit ka Shkenshynriah ka la lah ba kan ioh ban thep haduh lai tylli ki kol, hynrei katba nang iaid shakhmat ka Rymbai Shkenshynriah SC ba kan tehlakam ia ka jingiakhun tad haduh ba kan da lah ba kan khur artad ia ka jingjop.
Kumta ha kaba kut jong kine ki jingiakhun, haba phai pat sha ka miej iakhein point, ka Langsning FC ba kan iai neh ha ka kyrdan ba nyngkong hadien ba ka la lah ban khur 9 point, ryngkat bad ka Shkenshynriah, kaba ka jingiapher hangne ka long ha ka head-to-head, katba ka Nangkiew Irat kan don haka kyrdan kaba lai hadien baka la ioh ba kan khur 6 point, ka Maram FC pat 0 point.
Lashai pat ka sngi ka jingiakhun kan dei biang pat jong ka Group A ka Nongkseh SSCC kan iakhun ia ka Rangdajied United FC ha ka por 2 baje nohphai sngi, bad bynrap da ka jingiakhun hapdeng ka Shillong Lajong FC pyrshah ia ka Mawlai SC kaban long ha ka por 6 baje janmiet, ka jingiakhun kaba ki ar kynhun ki donkam ia ka jingjop ban ioh bat ia ka kyrdan kaba ar.
