Shillong, Naiwieng 07: Ki samla pule ka skulbah North Eastern Hills University (NEHU) Shillong hynne ka sngi kila thang ia ka tyngshop u Vice Chancellor Prof PS Shukla, Registrar, Deputy Registrar (Academics), Officer on Special Duty (Director, College Development Council) bad u Guest House In-charge.
Ia kine ki tyngshop la thang hakhmat ka khyrdop jong ka ophis treikam Administrative Block ha ka jingiadonlang baroh ki samla pule ka NEHU Shillong campus.
Ha ka por mynstep, ki samla pule kila nang pynjur ia ka jingiakhih da kaba khang tala syndon ia ki khyrdop jong kane ka skulbah ban pynthikna ia ka jingtreikam ka rai khang khyrdep ia ka skulbah.
Ka NEHU Shillong Campus ka la khang khyrdep ha ka sngi kaba ar hadien ba ki samla pule jong ka NEHU hapoh ka lama jong ka NEHU Students Union (NEHUSU) ba la kyrshan da ka KSU-NEHU Unit, ki la shim ia ka rai ban pynlong ia ka jingshah thngan khlem pud sngi bad ban pynlong ia ka jingkhang khyrdep (Total Lockdown) ia ka skulbah.
Hapdeng ka jingiakhih, u Vice Chancellor ka NEHU u Prof PS Shukla u la mih ban iakynduh ia ki samla pule hynrei kala mih pynban ka jingiania ktien kaba jur bad ki samla pule.
“Ngim pdiang ia ka jingpynshisha jong phi ha ki lad pathai khubor. Ngim pdiang ia kane. Ngi kwah ba phin hiar shuki noh mardor na ka kam VC” ong ki samla pule kiba iakhih hakhmat ka khyrdop Administrative Block.
“Ngim sngewtynnad ia ka jingpynshai jong u VC ha kaba iadei bad ki jingdawa jong ngi. Ngi kwah ba u VC un hiar shuki da ka jingsngewrit bad ngi kwah ba udei ban wengkam mardor iaki ophisar ba u la thungkam” ong u General Secretary ka NEHUSU u Toniho S Kharsati.
U samla Toniho u la ong ba ki samla pule kin ym kynran dien na kine ki jingiakhih bad kin bteng ia ka jingiakhih jong ki kaba dang iaid tad haduh ba la pynurlong ia ki jingdawa.
 Shillong hynne ka sngi kila thang ia ka tyngshop u Vice Chancellor Prof PS Shukla, Registrar, Deputy Registrar (Academics), Officer on Special Duty (Director, College Development Council) bad u Guest House In-charge.){kind=link}