Imphal, Nailar 07 : Ka Sorkar Jylla Manipur kala pynjari kyrkieh da ka jingkhang kor internet ba san sngi lynter hapoh ka Jylla naduh hynnin ka miet sngi Saitjain hadien ba u Superintendent of Police ka Bishnupur district u la pyntip halor ka jingshah thang kawei ka kali ha kumba lai bad sawngut ki briew ha Phougakchao Ikhang .
Kane ka jingiakynad ka la pynmih ia ka jingsngew iapher jaidbynriew, ong ka hukum.
Katkum katei ka hukum la ong ba katto katne ki riew bymman ki la pyndonkam ia ki social media ban pynmih ia ki ktien pyniashun bad ka jingpynkhihwin paidbah.
Kane ka jingjia ka la wan jia ruh ha ka por ba ka jylla naduh kine ki khyndiat sngi ba la lah ka la sakhi ia ki jingiakhih, ki pakhang surok bad ka jingkhang pyrshah ia ki kali kit mar ha ki surok highway jong ka ia ka ba la khot pynlong da ka All Tribal Student Union Manipur (ATSUM) …ka ba dei ka seng samla pule ba khlainbor jong ki trai shnong ka Manipur ka ba la dawa ban wanrah ia ka mat ka ba iadei bad ka Manipur (Hill Areas) Autonomous District Council Bill 2021 hapoh ka iingdorbar Assembly.
Kane ka bill ka dei kaba la thaw ha u snem bala dep bad ka dei kaba aibor shuh shuh ia kito ki jaka jong ki trai shnong ka jylla.
Ka jingiakynad ka la mih kynsan hadien ka jingpynbna ia ka jingkhang pyrshah ia ki kali kit mar lyngba ka surok national highway ha kane ka step sngi Thohdieng ba la lah.
Kane ka seng ki samla pule ka la dawa ba ia ka Manipur (Hill Areas) Autonomous District Council Bill 2021 dei ban wanrah hapoh ka iingdorbar Assembly.
Ki San ngut ki nongialam ka All Tribal Students’ Union Manipur (ATSUM) ki ba la shah kem ha kine ki khyndiat sngi ba la dep, ki la shah rai set along haduh 15 sngi ha u Chief Judicial Magistrate, Imphal West hynnin ka sngi Saitjain.
Ka jingkulmar ka la nang jur bad ki jingiakhih paidbah kila khie ruh ha ki bynta bapher bapher ka Manipur halor ka jingdawa ban pyllait noh mardor ia kitei ki San ngut ki nongialam ka ATSUM khlem kano kano ka jingbuh kyndon.
Kane ka jingkhang pyrshah ia ki kali kit mar ka la pynlong ia ka kynhun seng jong ka thain, ka Meitei Leepun ba kan leit khang tala ia ka ophis jong ka ATSUM ha Imphal ha ka janmiet sngi Thohdieng ba la lah.
Ka Meitei Leepun ka la kam ba katei ka jingpakhang la thmu pyrshah ia ka thain ka jong ki ha ka jylla.
Hynnin ka sngi Saitjain ka All College Tribal Students’ Union Imphal ka la pulom ban pyn long ia ka jingiakhih ha Imphal hadien ba ki la shah khanglad ha ki bor pulit ka Manipur kiba la pyndonkam ruh da ki lyer pynsat khmat ban pynpra ia ki paidbah.
Kane ka jingjia ka ba la wanrah ia ka jingmynsaw jong kumba 30 ngut ki nongiakhih pyrshah bad laingut ki bor pulit.
