Dimapur, Naitung 14: Ki bor pahara ki la pynlong ia ka jingkhynra kaba jur ha ka District Chumoukedima jong ka jylla Nagaland hadien ba uwei u shipai jong ka Assam Rifles u la iap bad saw ngut kiwei pat ki shipai bad uwei u riew paidbah ki la mynsaw hadien ka jingbthei bom IED kaba la thmu ia kawei ka kali ha ka sngi Nyngkong.
Ka NSCN/GPRN (NSCN-IM) ha ka sngi ba-ar, ka la pynrem jur ia ka jingbthei bom IED hajan Khopanala, Sukhovi, da kaba kdew ia kane kum ka “kam lehnoh kaba shyrkhei” kaba thmu ban pynthut ia ka jingsuk ha katei ka thain.
“Ka NSCN/GPRN ka pynrem khlem jingartatien ïa ka jingleh riewkhlaw jong ki lehnoh bad pynbthei ïa u Improvised Explosive Device (IED) uba la shim ïa ka jingim jong uwei u shipai India bad pynmynsaw ïa saw ngut kiwei pat ha ka 13 tarik Naitung 2026 hajan ka shnong Khopanach Sukhogitimate. Ka jingthmu ka long tang ban pynphriang ïa ka jingtieng, ban pynmih ïa ka jingkulmar, bad ban pynduhjait ïa ka jinglong jingman kaba suk kaba ki paidbah ki la kwah slem bad ki la trei ban pynneh pynsah,” la ong ka kyrwoh khubor jong ka NSCN/GPRN.
Shuh shuh ka la ong, “Ka jingpyndonkam ia ki tiar pynbthei bad ki bom ka long pyrshah ia ki nongrim jong ka jinglong briew bad ka buh ia ki jingim ba lui lui ha ka jingma kaba ym lah ban pdiang. Kum ka nongsoi ia ka Geneva Call Deed jong ka jingkular kaba khang pyrshah ia ki kynja bom, ka NSCN/GPRN ka dang don ka jingkitkhlieh kaba skhem bad kala kyntait ba pyndonkam ia ka kum kine ki tiar,”.
Ka NSCN/GPRN ka pynpaw ba ka dang don hapoh ka jingiateh kular jong ka Indo-Naga Ceasefire Agreement bad kan dang iai bteng ban burom ia baroh ar jng ka letter and spirit jong ki kyndon Ceasefire Ground Rules bad ka dang iai bteng ban pynneh ia ka jingsuk, ban pyndonkam ia ka jingpyniaid, bad ban pynthikna ba ka jingpyniaid jong ka ka long katkum ki kyndon jong ka ceasefire arrangement.
“Kane ka kam kaba lah ban kynthoh ka long ka jinghiar thma ym tang ïa ki lanot hynrei wat ïa ka jingshong suk shongsaiñ jong ka thaiñ. Ha ka por ba ki paidbah ki angnud ban im ha ka jingshngaiñ bad ka jinglong kaba thikna, kito kiba donkti ki la jied ïa ka lynti jong ka jingtieng bad jingpynkhihwin.Kum kine ki kam ki long kiba la thmu ban bet ïa ka jingbym shaniah, ban pynmih ïa ka jingbymsuk bad ban pynduhjait ïa ka jingsuk” ong ka kyrwoh.
Ka NSCN/GPRN kan pyrshang katba lah, lyngba ki lad ki lynti kiba don bad kiba biang, ban pynthikna ba ia ka jingshisha kaba don shadien jong kane ka jingjia bad ban ithuh ia kiba donkti. Kito kiba wad ban pyndonkam ia ka jingleh donbor ban pynthut ia ka imlang sahlang ki dei ban shah pynpaw paidbah bad shah pynngat ha ka jingkitkhlieh.
Uwei u shipai jong ka Assam Rifles u la khlad noh bad saw ngut kiwei pat ki la mynsaw ha ka jingbthei bom (Improvised Explosive Device) (IED) ha ka District Chümoukedima jong ka Nagaland ha ka sngi Nyngkong.
Utei u shipai uba la khlad noh la tip kyrteng kum u- Havaldar Mohammad Iqbal.
La iathuh ba katei ka jingbthei bom, ka dei hajan Sukhovi, ha kaba ki shipai Assam Rifles, ki don ia ka training centre, ha ka por ba ki bor pahara, ki dang iaid lyngba katei ka jaka.
Ia ki briew kiba la mynsaw la pynkit noh mar mar sha ki jaka ai jingsumar.
