Dimapur, Rymphang 10 :U convener ka NEDA u Himanta Biswa Sarma u la pynlong ia ka jingialang ba kongsan ha kaba iadei bad kane ka ilekshon assembly ka ban wan bad u Myntri Rangbah (CM) ka Nagaland u Neiphiu Rio, u Symbud Myntri rangbah (Dy.CM) u Y Patton bad u president ka BJP ka jylla u Temjen Imna Along hapoh Niathu resort ha Chumoukedima ha ka 9 tarik mynta u bnai.
Na ka liang u CM ka Nagaland u Neiphiu Rio ula pynpaw sha ki lad pathai khubor ba ha kane ka jingialang ki la iamir jingmut ha kaba iadei bad ki jingpynkhreh na ka bynta kane ka ilekshon ka ban wan.
“Ki kam ialap ilekshon ki la iaid shakhmat bad kumta ruh ngin hap ban shim ia ki sienjam bad pynlong ruh ia ka jingialang,” ong u CM Rio.
Kham hashwa, ha ka jingialang kaba la long hapdeng ki nongialam ka NDPP bad ka BJP napoh central ha New Delhi, kata kaba kynthup ia u CM Neiphiu Rio, kine ki ar party ki la poi sha ka jingiamynjur ha kaba iadei bad ka jingiabhah ia ki seat ka ban long da 40:20.
Nalor kata, u Neiphiu Rio u la ong ruh ba kan ym don satia kano kano ka jingialeh hapdeng ka NDPP bad ka BJP.U la ong ruh ba ia ka list jong ki kyrtong ka NDPP yn sa pyllait noh shen.
Ha kawei pat ka bynta ka BJP ka la rai kut da kaba wanrah ia ki hynriew ngut ki durkhmat thymmai ki ban ia aireng ha kane ka ilekshon assembly ha ka sien kaba nyngkong.
Napdeng kine ki durkhmat thymmai ki kynthup ia u Bashangmongba naTuensang Sadar 1, Kahuli Sema na Atoizu, Konngam Konyak na Phomching, Panjung Jamir na Tuli, Renbonthung na Wokha bad u Sethrongkyu Sangtam na Longkhim Chare.
