Guwahati, Rymphang 10 :Hapdeng ka jingkhynra halor ki kam pyniathoh shongkurim khynnah ha ka jylla, ka sorkar Assam ka la thaw ia ka cabinet sub-committee ban shim ia ka rai kaba khatduh ha kaba iadei bad ka polisi ban pynbiang jaka shong na ka bynta ki lanot kiba shah pyniathoh shongkurim khynnah hapoh ka 15 sngi.
Ia kane ka rai la shim ha ka jingialang ka kynhun myntri ba la pyniaid da u CM ka Assam u Himanta Biswa Sarma ha ka 9 tarik mynta u bnai.
“Mynta ka kynhun Myntri ka Assam ka la pyrto ia ka jingtrei borbah ki bor pulit ka jylla kiba la bteng ia ka jingkhynra pyrshah ia ka kam pyniathoh shongkurim khynnah, bad ka la hukum ruh ia ki ba kin dang iai bteng.Nalor kata ka kynhun myntri ka la thaw ruh ia ka Cabinet Sub-Committee ban shim ia ka rai kaba khatduh ban pyntreikam ia ka ‘Rehabilitation Policy’ hapoh ka 15 na ka bynta ki lanot kiba shah pyniathoh shongkurim khynnah,” pynpaw u CM Sarma lyngba ka twitter.
Ki dkhot jong ka sub committee ki kynthup ia u Myntri ka tnat ka koit ka khiah u Keshab Mahanta, u Myntri ka tnat pule puthi u Ranoj Pegu bad u Myntri pla tyngka ka jylla u Ajanta Neog.
Haba kren sha ki lad pathai khubor halor katei ka mat, u Pegu u la ong ba ka committee kan bishar bniah ha kaba iadei bad ki lad ki lynti kumno ban pynkynriah ia kine ki khynnah kynthei kiba dang hapoh rta kiba shah pyniathoh shongkurim beain.
“Ka cabinet sub-committee ka la shah pynkhamti ruh ban wad ia ki lad ki lynti lane ki song jingiarap na ka bynta ki lanot kiba la ngat ha ka jingshah pyniathoh ha ka rta kaba dang khynnah,” u la ong shuh shuh.
Nalor kata, ka cabinet ka la shim ruh ia ki katto katne kiwei pat ki sienjam bad ki jingshim rai, abd kawei na kine ka long ban tei ia ki 10 tylli ki district hospital kiba thymmai lyngba ka ram na ka World Bank.
“Ia ka jingpynkhreh ha kaba iadei bad ka jingioh pdiang ia katei ka pisa na ka World Bank la lah ban pyndep.Yn pynbha sa ia kumba 25 tylli ki hospital ha ki thain nongkyndong ha ka jylla,” ong u Mahanta.
Katkum u Mahanta, ka cabinet ka la shim ia ka rai ban pynlut kumba 150 klur na ka bynta ka jingtei kaba la iaid shakhmat ia ki hynniew tylli ki hospital ki ba sumar ia kiba pang bampong ne cancer.
