Kohima, Nailar 15 : Kumba arngut ki shipai ka Assam Rifles ki la ngat ha ka jingmynsaw ha ka jingiather kuli bad ki suba lehnoh na ka tnat Yung Aung jong ka NSCN-K.
Kane ka jingiather kuli hapdeng ki shipai ka Assam Rifles bad ki dkhot ka kynhun seng lehnoh NSCN-KYA ka la jia hynne ka step sngi Nyngkong ha Mon district ka Nagaland. Ia kane ka jingjia la pynthikna ruh da ki shipai ka Assam Rifles.
Ia kitei ki arngut ki shipai ba la mynsaw la pynkit noh shapoh Jorhat Air Force hospital ha Assam na ka bynta ban aijingsumar.
Ha kawei pat ka bynta, na ka liang ki shipai Assam Rifles ki la ong ba ki la suba jur ba ka la don ka jingiap sha ka liang ki lehnoh ha katei ka jingiather kuli.Ka jingkhynra ka ba jur ban lapdien ia kitei ki lehnoh ka dang iaid shakhmat, ong kane ka tnat shipai.
Ha ka por kumba 2:25 mynstep hynne ka sngi Nyngkong, ki bor shipai ki la pynpaw ia ka jingsuba halor ka jingdon jong ki lehnoh ki ba wan na ki bynta jong ka Zankham sha Nyasa.Hadien ba ki la shah khanglad ha ki bor shipai, kine ki lehnoh ki la sdang ban ther kuli ka ba la pynlong ia ki bor shipai ba kin pynphai markylliang bad ka ba la wanrah ka jingduh ka ba jur sha ka liang ki lehnoh.
Ha kane ka jingiather kuli arngut ki shipai ka Assam Rifles ki la ngat ha ka jingmynsaw bad ia ki ba la pynkit noh mardor shapoh Jorhat Air Force Hospital na ka bynta ka jingsumar.Ia kine ki shipai la pynkynriah noh da ka jingiarap lang jong ki trai shnong ki ba la ai ka jingkyrshan ka ba pura ia ki bor shipai, ong u heh ka tnat shipai.
