Guwahati, Nailar 15: U Myntri Rangbah (CM) ka Assam, u Himanta Biswa Sarma ha ba aijingkren hynne ka sngi Nyngkong u la ong ba kam don satia kano kano ka jingkylli ba ka Assam kan iakhlad noh na ka India.
Ia kane u CM Sarma u la pynpaw ha ba aijingkren ha ka jingrakhe ia ka sngi laitluid jong ka ri (Independence Day) ha ka nongbah Guwahati hynne ka sngi Nyngkong.
Watla u CM ka Assam um shym la pynmih ia ka kyrteng jong ka kynhun seng lehnoh ULFA-I ha ka jingkren ka jong u, hynrei kane ka kdew shai ba ka jingkren jong u ka thew ia katei ka kynhun kieng atiar ba la lamkhmat da u Paresh Baruah.
“Kine ki laingut ba la dep ki long ki nuksa na ka bynta kito ki ba phohsniew halor ka jingsynshar hi.Ki nongshong shnong ka Assam ki la ai ia ka jubab ka ba shai kdar na ka bynta kito ki ba phohsniew halor ka jinglaitluid na ka ri,” ong shuh shuh u CM Himanta Biswa Sarma.
“Ka Assam ka dei ka bynta jong ka India naduh ki bor ki ba la rim bah.Kumta ruh kam don kano kano ka jingkylli halor ka jingiakren halor ka mat jong ka jingsynshar hi”. Ha ka juh ka por u kyntu ruh ia ka seng ULFA-I ba kan wan sha ka miej jong ka jingiakren da ka ba weng sharud ia ka jingdawa laitluid.
“Ka Assam kam kwah ban iakhlad noh na ka India.Ka Assam ka la pyniasoh ia lade ba ka lama lai rong,” ong shuh shuh u Sarma.
Nalor kata u la ong ruh ba ka sorkar Assam ka la rakhe ia ka ‘Vibhajan Vibhishika Smriti Diwas’. Shuh shuh u la ong; “Mynta ngi la shim ia ka jingkular ba ngin ym shah ba ka India sa shisien pat kan shah ktah ha kino kino ki jingialeh pyrshah.Ngi la shim ia ka sienjam ban kiar na ki jingiaumsnam ha ka jingim.”
