Nongpoh, Risaw 13: Uwei u nongñiah truck u la khlad noh ha shen ha ka jingjia aksiden kaba la jia hynne ka janmiet ha surokbah National Highway 6 (NH-6), ha ka thaiñ Umling, Ri-Bhoi District, hadien ba ka truck kaba u ñiah ka la leit ban tynrah nadien jong kawei pat ka truck, kaba la pynlong ïa katei ka truck ban kylla hapdeng surok.
Katkum ka tyllong khubor, katei ka jingjia ka la jia ha ka por kumba 7 baje janmiet, ha kaba baroh ar tylli ki truck ki dei kiba kit ïa ki dewbilat bad ki dang hiar sha ka liang Guwahati.
Ka truck kaba tynrah nadien ka don ïa u registration number WB 57 D 2824, katba ka truck kaba shah tynrah ka don ïa u registration number AS 01 TC 1913.
Katkum ka jingtip ba ïoh, ka truck ba tynrah kala pynher sted bha bad haba ka la poi ha katei ka bynta jong ka surok kaba long khongwaiñ, ka la leit ban tynrah beit beit nadien jong kawei ka truck ba hakhmat.
Na katei ka jingjia, ka truck kaba shah tynrah ka la kylla hapdeng surok, hynrei ym shym la don kiba mynsaw na katei ka truck. Katba, ka truck kaba tynrah nadien ka la julor ha ki bynta ba sha khmat, bad u nongñiah jong ka u la sahkut hapoh ka truck, bad u la khlad noh ha katei hi ka jaka.
Ki Pulit kila register case halor kane ka jingjia bad ka jingtohkit mynta kala iaid shakhmat.
