Shillong, Risaw 13: Ka Khun Hynniewtrep National Awakening Movement (KHNAM) ka kyrshan tyngeh ban pynlong ia ka ktien Khasi kaba kongsan na ka bynta ki test ha District Selection Committee (DSC) ha Khasi-Jaintia, da kaba kyntait ban pynlong ia ka ktien Garo kum kawei pat ka sobjek ha Khasi bad Jaiñtia.
Kane ka jingkynthoh ka wan hadien ba ka All Khasi Hills Achik Joint Action Committee (AKHAJAC) ka la wad ban pynrung ia ka ktien Garo kum ka ktien ba lah ban jied (optional qualifying language) na ka bynta ban thungkam ha ki hynniew tylli ki district jong ka ri-lum Khasi bad Jaintia.
Haba pyrshah ia katei ka jingdawa, u Working President ka KHNAM Bah Thomas Passah u la ong ba ka KHNAM ka ieng ryngkat bad ka HNYM kaba la pyrshah ia katei ka jingthmu.
Haba ïadei bad ka Office Memorandum (OM) ka Tnad Personnel, u Passah u la ong, “Ka Sorkar ka la buh ban pass ïa ka test ktien Khasi kum ka kyndon ba donkam ban ïoh ïa baroh ki kyrdan treikam kiba hap hapoh ka DSC ha ki san tylli ki district jong ka Khasi Hills bad ar tylli ki district ka Rilum Jaiñtia.”
Haba iada ia katei ka hukum, u la ong ba ka Meghalaya ka don ar tylli ki jaitbynriew kiba heh bad ka jingpyniakhlad ia ki jaka ka long ban iada na ka jingialeh pyrshah.
“Ka long kaba donkam bha ban sngewthuh ba ka jylla jong ngi ka don ar tylli ki jaitbynriew, ki Garo bad ki Khasi, bad la pyniakhlad ia ka jaka hapdeng jong ki ban pynthikna ba kan ym don kano kano ka jingialeh pyrshah ha ki por ban wan,” la ong u Bah Passah.
Katkum ka jingong jong u, ka jinglong hok katkum ka ktien ka iada ia ki jingmyntoi jong ki trai ri trai muluk na baroh arliang.
“Ka jingpynlong kongsan ia ka ktien Khasi ha Khasi bad Jaintia Hills kan iada ia ki trai ri Khasi. Kumjuh ruh dei ban pynlong kongsan ia ka ktien Garo ha Garo Hills ban iada ia ka jaitbynriew trai ri trai muluk Garo,” u la ong.
