Karimganj, Nailar 15 : Uwei u samla u la ngat ha ka jingmynsaw ka ba jur hadien ka jingkynnoh ba u la shah thombor bad shah theh da ka acid hapoh Karimganj district ka Assam ha kane ka miet sngi Saitjain ba la lah.
Katkum ki khubor la iathuh ba une u samla ia u ba la tip kyrteng kum u Manjur Ahmed ha ka ba nyngkong u la shah bom shah tied bad hadien u la shah theh da ka acid. Hadien kane ka jingjia na ka liang ki trai shnong ki la pyntip mardor sha ki bor pulit. Une u samla u la ngat ha ka jingmynsaw jur ha ki ba bun ki bynta jong ka met jong u ha ka ba la pynkynriah noh mardor shapoh Gauhati Medical College and Hospital (GMCH) hapdeng ka jingshitom ka ba jur.
Ha kawei pat ka bynta, na ka liang ki ba haiing hasem jong une u lanot ki la leit ban ujor hapoh Patharkandi police station. “Ia ki nongthombor ym pat lah satia ban ithuh. Hynrei watla katta ka jingtohkit halor kane ka jingjia ka la iaid shakhmat bad ba ki riew bymman kin ym lait na ka jingshah pynshitom,” ong ka khubor ka ba la shim ia ka jingkren jong u heh pulit.
Lah ban kdew ha une u bnai ba la dep, kawei ka longkmie ka la duh ei ia la ka jong ka jingim ha Karimganj district hadien ba ka la shah pynbor ha la u jong u kurim bad ki kiaw ki thaw jong ka ba kan dih ia ka acid.Ia kane ka lanot la tip kyrteng kum ka Sumna Begum.
Katkum ki khubor la ong ba kane ka briew ka la shah pyniap tang namar ba ka la kha da i khun kynthei ia ka ba ki kiaw ki kthaw kurim bad u kurim jong ka ki kwah da u khun shynrang.
Watla katta na ka liang u superintendent of police ka Karimganj district, u Padmanabha Baruah u la kyntait ia katei ka jingkynnoh.U Baruah u la ong ba katkum ka jingtohkit da ki pulit la shem ba ka jingiania hapdeng kitei ki shi kurim ka dei ka dawbah ka ba la lam sha kane ka jingjia.
Ha ka ba nyngkong u Ahmed u la bom la shoh ia ka Sumna bad hadien u la pynbor ba kan dih ia ka acid. “Ngi la kem noh ia u Ahmed lem bad ia ka kmie jong u,” ong utei u heh pulit.Kane ka jingjia ka la wanrah ka jingkyndit ka ba khraw ia ki nongshong shnong ha ka ba ka la mih ruh ka jingbitar pyrshah ia u Shakeel Ahmed lem bad ia ki ba haiing hasem ki jong u.
