Shillong Nailur 12: U Symbud Myntri Rangbah ka jylla uba khmih ruh ia ka tnad Commercial & Industries u Bah Sniawbhalang Dhar ula pynbna ba ka sorkar kala shim ia ka rai ban pyntreikam ia ka jingai jingiarap kaba tang shisien ne ka One-Time Special Industrial Closure Scheme na ka bynta ki nongtrei jong ka Mawmluh Cherra Cements Limited (MCCL).
Ula iathuh, ba kam don kano kano ka jingtyrwa ban pynkylla noh ia ka MCCL sha ka karkhana shimet hadien ba kala don mynshwa ka jingtyrwa ban leh ia ka Joint Venture Partner bad ka MCCL kam shym la lah ban urlong namar ka jingbym ioh ia kano kano ka kynhun ban iatreilang.
“Namar ban pynkhie im biang ia ka MCCL kam long satia kaba lah ban long namar ka jinglong jingman ka mariang, ka pisa pilaian bad ka jingdkoh ha ka rukom pyntreikam bad ban pynthikna ba kan don ka jingsiew bai lutksan ne Compensation kaba biang sha ki nongtrei bad baroh kiba don bynta ha ka kam, da ka jingthmu ban pynduna ia ka jingeh kaba kin mad na ka jingkhang ia ka karkhana, la mynjur ia ka one-time special industrial closure scheme na ka bynta ki nongtrei ha ka 9 tarik u Nohprah 2024 kaba ka “Cut-off Date” kaba ha ka 31 tarik u Nohprah 2024 na ka bynta ki nongtrei ia kaba la pyntreikam. Ka pisa na ka bynta kane ka kam kala kot sha ka T. 83.71 klur” la ong u Bah Sniawbhalang Dhar haba jubab hapoh ka iingdorbar thawain hynne ka sngi Thohdieng.
Ula bynrap ba kane ka One-Time Special Industrial Closure Package ban pynbeit ia ki ram ki shah jong ki nongkhaii bad ki kontraktor kala kot sha ka T.7.73 Klur bad T.6.81 Klur ban siew pyndep ia ki jingsiew sha ki nongtrei kiba rim.
Ka Lease bad ka sorkar jylla kala treikam haduh ka 25 tarik u Naiwieng 2021 bad la mynjur ban pynjlan haduh ka 31 tarik u Lber 2030 halor ka Nongrim jong ka jingbud ryntih ia ki kyndon kiba la buh da ka sorkar.
Ka ‘Lease Agreement’ bad u Syiem Sohra kala kut ha ka 25 tarik u Rymphang 2022 na ka bynta ka jaka ha Sohra kaba 354.58 akar ne 143.49 hektar bad ka ‘Lease Agreement’ bad ka Dorbar Mawmluh kala kut noh ha ka 13 tarik u Nailur 2017 na ka bynta ka jaka ha Mawmluh kaba don 345.13 akar ne 139.64 hektar.
Ka karkhana MCCL kam shim la treikam naduh u Lber 2020 hadien ba kala don ka jingkhang dam hapoh ka ri namar ka jingsaphriang ka khlam COVID-19 bad naduh u Naitung 2020, kila don bun ki jingiakren kiba la lum da ka sorkar bad baroh kiba don bynta lang ha katei ka kam.
U Bah Sniawbhalang Dhar ula ong ba kala don ka jingkhmih bniah da ka IIFCL Pvt Ltd kaba la buh ba donkam T.190.32 Klur ban pynkhie im biang ia katei ka karkhana.
Namar ka jingkyrduh pisa kala khanglad ban sdang biang ia ka jingpyntreikam, kaba la lam sha ka jinglang ka pisa ban siew pyndep ia ki jingsiew ki bapher bapher, ka jingsiew sha ki kynhun bapher bad ia ka tulop jong ki nongtrei bad kiwei kiwei ki jingsiew.
Ban shimkhia ia kane ka jingjia, ka sorkar kala mynjur ha u Naitung 2021 ia ka jingtyrwa ban sdang ia ka Joint Venture (JV) ban wad ia ka karkhana shimet ban iatreilang bad ka Mawmluh Cherra Cements Ltd (MCCL).
La pynmih ia ka Expression of Interest (EoI) kum ka lynti kaba nyngkong ha kaba kila dpon 3 tylli ki kynhun kiba la jubab ia ka EOI ha u Iaiong 2022.
Kawei ka kynhun shimet M/s Arihant International Ltd Guwahati kala shah weng noh “Disqualify” halor ka jingbym lah ban pynbiang ia ki jingdonkam jong ka EoI.
Sa kawei ka kkynhun M/s JK Cement Ltd, New Delhi kala weng noh ialade.
Sa tang kawei ka kynhun kaba la pyni ia ka jingdon jingmut kadei ka M/s Bhavika Commercial Pvt Ltd, Kolkata kaba pyni ia ka jingpynkhreh ne ‘Presentation’ ha ka 30 tarik u Jymmang 2022 bad ha ka 18 tarik u Naitung 2022. Hynrei kala paw ba katei ka kynhun kala pyniaid bun tylli ki karkhana pynmih dewbilat hynrei kam shim la don pat ia ka Integrated Cement Plant.
La kyrpad ia katei ka kynhun ban aiti shuh shuh ia ki kot ki sla katkum ka kyndon jongka EoI. Wat hadien ka jingpynkynmaw la bunsien, katei ka kynhun kam shim la aiti satia ia ki kot ki sla kiba donkam.
Namar ka jingbym lah ka M/s Bhavika Commercial Pvt Ltd, Kolkata ban aiti ia ki kot ki sla kiba kongsan, ka EoI ban wanrah ia ka kynhun ban iatreilang kala shah pynduh pyndam noh ha ka 15 tarik u Nohprah 2023.
.){kind=link}