Shillong Nailur 12: Ka Sorkar Jylla kala tyrwa ia ka Supplementary Demand kaba T.333 Klur na ka bynta ki projek kam pynroi ha ki jaka sor kaba kynthup ia ka jingtei ia ka Secretariat kaba thymmai, ka Additional Secretariat Complex bad ka Working Women Hostel.
Na katei, T.200 klur la pan lyngba ka Supplementary Demand na ka mang tyngka jong kane ka samoi kaba mynta ha kaba iadei bad ka Secretariat bathymmai ha New Shillong Township, ka projek kaban lut T.1231.03 Klur.
Ka Secretariat kan pynkhlain ia ki ophis sorkar, kan pynbha iaka jingiatreilang bad ka jingshakri kaba biang, la ong u Symbud Myntri Rangbah ka jylla uba khmih ia ka tnad pynroi sor u Bah Sniawbhalang Dhar haba jubab ia ka Cut Motion kaba la wanrah da u Nongialam ka Liang Pyrshah u Dr Mukul Sangma uba long ruh u MLA ka TMC na Ampati hapoh ka iingdorbar thawain ka jylla hynne ka nsgi Thohdieng.
Ula pyntip ruh ba la pan T.45 Klur lyngba ka Supplementary Demand ban tei ia ka Additional Secretariat Complex ha Tura bad ka jingliut jingsep jong kane ka projek ka kot sha ka T.165.80 Klur.
Kane ka complex kan ai jaka ia ki MLA, ki heh ophisar sorkar bad ia ki nongtrei ophis ban pynbha ia ka rukom synshar bad iaka rukom ai jingshakri.
U Symbud Myntri Rangbah ka jylla ula pyntip ba ka sorkar kala tyrwa ruh ban tei ia ka Hostel kaba don 400 tylli ki kamra thiah ha Shillong bad 200 tylli ki kamra ha Jowai bad Tura (ha ka jingliut kaba T.144.80 Klur) ban ialeh ban pynbiang ia ka jingdonkam ki kynthei bad ban ai ka jaka sah kaba shngain bad na ka bynta kane, T.88 Klur la pan lyngba ka Supplementary Demand na ka mang tyngka jong kane ka samoi kaba mynta.
