Shillong, Nailur 12: Ka jingiakhun hapdeng ka Malki SC pyrshah ia ka Nongrim Hills SC, ha ka lympung ialehkai jong ka Shillong Premier League 2025 la pynsangeh noh ia ka tang hadien shiphew mini tba la sdang ia kane ka jingiakhun hadien ba u slap uba jur u la wan ban ther tyngeh, kaba pynlong ia referee ban shim ia ka rai ban pynsangeh noh.
Kumba ka long ba ha kine ki khyndiat sngi kiba la leit, ka jingling ka jingman ka suin bneng ka pun beit u slap ha ka por mynsngi bad tang shu la dei pat ka por janmiet, u slap u la ther la kumba bat theh na ka ktang, bad u slap ba jur ba kum une, ka ktah bha ia ka jinglong ka jingman ka madan SSA Stadium, First Ground Polo, ha kaba hap ban ia kynmaw ba ka dei ka madan kaba dang shu dep ban siang da u artificial turf.
Kane ka jingiakhun ka Malki SC bad ka Nongrim Hills SS&CC ka long ka jingiakhun kaba baroh artylli ki kynhun ki don mynta ha u line saw jong ka relegation zone, ha kaba ki donkam ban khur beit ia ka jingjop na kane ka jingiakhun, hynrei haba la pynsangeh noh pat ia ka, kumta kan shong ha ka Tournament Committee ka SSA ba kin buh sngi buh ia biang ia kane ka jingiakhun hapdeng kine ki ar kynhun.
Lashai pat ka sngi, ka jingiakhun kan lonmgh hapdeng ka Langsning FC pyrshah ia ka Shillong Lajong FC, ha ka por 4:30 nohphai sngi.
Kumba ka long ia mynta ka Shillong Lajong kaba bat ruh ia ka nam kum ka lahduh jong kane ka lympung ka don ha ka kyrdan kaba lai hadien ba ka la ioh ba kan khur 8 point, bad ka Langsning FC ka don ha ka kyrdan kaba saw hadien ba ka la ioh ba kan khur 7 point.
