Itanagar, Nailur 27 :Ka sorkar Arunachal Pradesh kala ai ka jingmynjur na ka bynta ka jingtohkit da ka CBI ha kaba iadei bad ka jinglait tuh ki jingkylli jong ka APPSC AE (civil) exam.
Na ka liang u Myntri kam pohiing u Bamang Felix ula ong ba ka jingaiti ha ka CBI na ka bynta ban pynlong ka jingtohkit kan pynthikna halor ka jinglong laitluid, ka jingkhuid, ka jingbym shah liang bad ka ban pynkloi ia ka jingtohkit.
Lah ban kdew ba ka kynhun seng North East Human Rights Organisation (NEHRO) dang shen kala dawa da ka jingtohkit CBI ha kaba iadei bad ka jinglait tuh ki jingkylli na ka bynta ka AE (Civil) exam ha Arunachal Pradesh.
Ia kane ka eksam la pynlong da ka Arunachal Pradesh Public Service Commission (APPSC).Na ka liang ka NEHRO kala kynthoh pyrshah ia ka sorkar Arunachal Pradesh da kaba kynnoh donkti ha ka kam bamsap.
“Ka jinglait tuh ba dang shen jong ki jingkylli AE (Civil) ka pyni ba naduh ki nong synshar ba halor eh ka sorkar haduh kiba hapoh eh ki dei kiba donkti ha ki kam bamsap. Bad ka lah ruh ban don ka jingbanbor pyrshah ia ka commission na ka bynta ki jingioh nong da ki briew kiba don ha ka bor,” ong ka NEHRO.
Lah ban kdew ba ka Arunachal Pradesh Public Service Commission (APPSC) kala pyntip ba kan pynlong da kawei pat ka eksam kaba thymmai na ka bynta ka post assistant engineer (civil) bad ia kane ka jingpynlong yn sa pynbna shen.
Na ka liang u secretary ka APPSC u Jayanta Kr Ray ula ong ba kito ki nong aplai kiba la wan iashim bynta ha ki prelims exam na ka bynta ka post assistant engineer ki lah ban wan iashim bynta biang ha kane ka eksam.
