Shillong, Nailur 27 :Ka Sorkar Jylla kala dep ban pynkhreh ia ka ‘blueprint’ (ki plan) ban pynkylluid ia ka Nongbah Shillong bad la phah ia kane ka sha ka Indian Institute of Management (IIM) Shillong ba kan ai buit bad ai jingmut lem.
Ia kane la pyntip da ka Sorkar Jylla sha ka Iingkashari Meghalaya High Court hynne ka sngi ba-ar haba shong bishar ia ka PIL bala mudui da u Bah Philip Khrawbok Shati halor kane ka kam.
Ka Sorkar kala pyntip ba ka tnad kam Pohiing kala pynkhreh ia kane ka plan ban pynkylluid ia ka Nongbah Shillong ha ryngkat ka jingiasyllok bad ki Tnad bapher bapher, kaba la pynshong nongrim ruh na ka kaiphod bala aiti da ka Dalberg Global Development Advisor ha u Kyllalyngkot, 2021.
U Advocate General ula ong ba ia kane ka blueprint kaba bniah bha, la dep phah sha ka Indian Institute of Management (IIM) Shillong ba kan ai buit bad ai jingmut lem.
Ka blueprint ka dei eh kaba la pynshong halor ki saw tylli ki nongrim ba kumno yn lah ban pynheh ia ki surok, ban pynbun ia ki kali kamai ka sorkar bad ban pynduna ia ka leit ka wan ki kali .
KI don ruh ki kam kiba la batai bniah kaba sdang da ka jingweng noh ia kiba kyntur sha ki surok bad ki lynti iaid kjat, ban wanrah ia ki bus corridor bad ban thaw ia ka lynti thymmai ha ka leit ka wan kum ka ropeway.
Kala don ruh ka plan ban bu ia ka Traffic Management Centre ha ryngkat bad ka jingpynheh ia ki surok bad ban shna ruh ia ki surok by-pass na ka Nongbah.
Ha ka hukum, ka Iingkashari kala ong “Naba ka Sorkar kala dep pynkhreh ia ka plan ba bniah bad watla ym shym la pynpaw eiei ia ka song pisa ban pyntreikam ia kine ki project, hynrei la kyrmen ba ka Jylla kan leh eiei halor kine hadien ba kala iohktien na ka IIM, Shillong.
Ka Iingkashari kala buh ban shong bishar biang ia kane ka kam ha ka 28 tarik u Risaw.
