Shillong, Risaw 12: Ka Diengshynrum SC kadei ka kynhun kaba nyngkong ban rung sha ka Quarterfinal haka lympung Meghalaya Women’s State League 2025.
Kane kadei hadien ba ka Diengshynrum SC kala ioh ban bat ia ka kyrdan ba ha khlieh duh ha ka Group C.
Ka Diengshynrum jong ka East Jaiñtia Hills District Football Association bad ka Chirupheiwi Nongkynrih FC jong ka Laskein Block Sports Association ki dei tang ki ar tylli ki kynhun kiba don ha ka Group C.
Haba iadei bad kane kine artylli ki kynhun kila hap iakhun mar arsien bad tang ka kynhun kaba ha khlieh duh kan jam shaka QuarterFinal ha kaba ka Diengshynrum ka la jop ruh da 2-0 ha ka 2 tarik Risaw.
Ka Charlinda Nongtdu (8’, 43’ 72’ 85’) ka la thep saw kol na ka bynta ka Diengshynrum haka jingialehkai kaba la long ha Khliehriat, ha kaba ka Saphapaya Lyngdoh (12’), ka Deimonme Lyngdoh (26’) bad ka Hapily Lyngdoh (78’) ki la thep mar shi kol.
Ha ka Group A, ka Na Rympei FA ka la sdang khie mynsiem biang hadien ba ka la shah rem ha ki ar tylli ki jingïalehkai ba nyngkong daka ba pynliem ïa ka Lapalang SSCC da 14-0 kol.
Ka Pynhun Shulet ka la lamkhmat kala thep hynniew kol (7’, 18’, 21’, 38’, 63’ 88’, 90’), ka Daai (19′), Remika (22′, 42′), Tracy Rympei (30′), Streamlet Taro (45′), Iawanlang Nongbet (54′) bad Wanmi Kharpan (60′).
Ha ka Group A ki don 5 tylli ki kynhun, ha kaba lai tylli ki kynhun kiba hakhmat eh kin rung sha ka Knockout Round.
Ka Laitkor SC, ka Pay For Right FA bad ka Na Rympei ki dei ki lai tylli kiba ha khlieh duh haduh mynta.
Ha ka jingïakhun ha ka Group B, ka Mawlum Tyrsad SC bad ka Mawten SC ki la ïakhaid da 0-0 kol, ka Bright Future SSCC ka la pynliem noh ïa ka Mawsawrit SC da 4-0 kol lyngba ka kol kaba la thep da ka Ricika Basawiawmoit (5’, 39’), ka B Thongni (50’) bad ka H Nongrum (88’).
Ka Group B ka dei thup kaba heh duh kaba don 6 tylli ki kynhun bad ki saw tylli kiba ha khlieh duh kin rung sha ka Quarterfinal.
Kumba ka long mynta ka Mawlum Tyrsad SC, ka Bright Future, ka Mawten bad ka Young SSCC ki don haki kyrdan ba ha khlieh duh.
Ha ka jingiakhun kaba tang kawei ka ban long ha ka sngi Nyngkong, ka Pay For Right FA kan iakhun pyrshah ia ka Attacker’s Youth Club ha ka por 10 baje mynstep ha ka Group A ha Shillong.
