Shillong, Naiwieng 03: Ka lympung ialehkai Phutbol Meghalaya Women’s State League 2025, ka la jam mynta sha ka kyrdan iakhun quarterfinal, bad lashai ka sngi ha ka por mynstep, ka kynhun ki thei ialehkai ka Laitkor SC kin mih madan ban aireng pyrshah ia ka Mawten ha ka por 10 baje mynstep.
Ki lai tylli ki quarterfinal kiba sah la buh ba kin long pat ha ka sngi kaba bud, katta ha ka sngi Balang jong ka taiew, ha kaba ki thei ialehkai ka Na Rympei Football Academy kin iakhun pyrshah ia ka Bright Future SSCC ha ka por 10 baje mynstep, ban bynrap pat da ka jingiakhun hapdeng ka Pay For Right Football Academy pyrshah ia ka Mawlum Tyrsad SC ha ka por 1 baje nohphai sngi, katba ka jingiakhun hapdeng ka Diengshynrum SC pyrshah ia ka Jakrem SC la buh ba kan long ha ka por 4 baje nohphai sngi ha kane ka juh hi ka jaka ne madan.
Ka jingpyniakap (draw) ia kine ki kynhun ban iakhun ia ka quarterfinal la pynlong da ka MFA ha ka 1 tarik mynta u bnai Naiwieng, bad hadien ba kut kane ka jingiakhun baroh, kan khreh ba kan jam pat sa sha ka kyrdan iakhun jong ka semi bad pynkut da ka phainal.
