Nongpoh, Naiwieng 03 : Kawei ka pla rong iong, kaba la ieh halor u maw kynroh ba phiah (divider) ia ka surok NH-6 ha Nongpoh hajan ka Meghalaya Apex Bank, kala pynher syrngiew ia ki paidbah ka thain namar ka jingsuba jur ba lehse ka dei ka pla ba buh bomb.
Ia kane ka pla la lap naduh ka por 5 baje janmiet bad mar mar, ki Pulit kila leit ban ker kut sawdong ia kane ka jaka ban pynthikna ba ki paidbah kin ym tur shajan kane ka pla.
Ki paidbah ka thain ki la dap da ka jingsyier bad ka jingrit mynsiem haba iohi ia kane ka pla kaba la buh halor kane ka kynroh surok-kaba pynartatien ia ki ioh lehse u dei u bomb khamtam hadien ka jinglap ia u bomb IED bala thep ha kawei ka pla kaba la ieh hakhmat ka Iing u MLA barim Bah Nehlang Lyngdoh, kaba don ha Umsning.
Ia kane ka jingjia ha Umsning la kam trai da ka seng Hynniewtrep National Liberation Council (HNLC), haba byrngem ia ki riew sain pyrthei kiba rim bad ba mynta ba kim dei ban die ia ka Jaidbynriew.
Ka kynhun Bomb Squad kala hiar mar mar sha Nongpoh bad ka jingtohkit mynta ka dang iaid shakhmat ban tip ia kaei kaba don ha kane ka pla.
Hadien katto katne kynta, ka kynhun Bomb Squad kala plied ia kane ka pla bad shem ba don tang ki jain bad kiwei ki tiar.
Ki Pulit mynta ki dang tohkit ban lap ia u trai jong kane ka pla.
