Shillong, Naiwieng 03 : “Lada leh hi te ka biang beit hynrei ban leh kiwei pat, kam long” ka dei ka ktien pharshi kaba kdew ia ka jinglong arsap – kaba iahap bha ban thew tarajur ia ki kam bad ki jingkren jong ka seng sain pyrthei Voice of the People Party (VPP) haba phai sha ka jingthungkam pura bad jingweng kam ia ki nongtrei adhoc/casual la ka dei ha ka Sorkar Jylla ne ki Autonomous District Council (ADC).
Ka jingkylli ban hap thew tarajur ka mih haba iohi ia kaei kaba jia ia ki Nongtrei Adhoc/Casual ha Khasi Hills Autonomous District Council (KHADC) kaba dang don mynta hapdeng ka jingshong bishar ka Iingkashari High Court pyrshah ia ka jingdawa u President ka VPP (Ardent M Basaiawmoit) ia ka Sorkar Jylla ba kam dei ban wengkam ia ki nongtrei Adhoc kiba la thungkam hadien u snem 2007.
U President ka VPP ha ka sngi Nyngkong (3 tarik Naiwieng 2025), ula aiti ia ka dorkhas sha u Myntri Rangbah ka Jylla Conrad K Sangma, ba pynpaw ba ka VPP ka pyrshah ia ka Office Memorandum jong ka Sorkar ba pynmih ha ka 25/09/2025 ba ong ba dei ban weng kam noh ia ki Nongtrei Adhoc ba thungkam hadien u snem 2007 bad ba ki hap ban iakhun ia ka eksam thungkam.
Ula ong ba ki Nongtrei adhoc ba thungkam hadien ka 31 tarik Nohprah 2007 kila ai ka jingshakri ba palat shiphew snem khlem ka jingsangeh kam bad ka jingshakri jongki, kala pynlah ia ka Sorkar ban pyniaid ia ki kam ki jam.
“Namar kata, ka long kaba sngew pyrshah ba kine ki nongtrei kin shah wengkam bad ba kin hap iakhun iaki eksamin thung kam..kam dei ka jingleh bakla jong ki ba kila shah thungkam bad iai bteng ban ai ka jingshakri”ula ong.
Kat kum ka dorkhas la ong “Halor kane, ka party (VPP) ka pyrshah jur ia ka hukum jong ka Sorkar ban weng kam ia kine ki nongtrei bala thungkam ha jaka ki sanction post. Ka long kaba bakla na ka liang ka Sorkar ban kyndit bynriew ha u snem 2025 haba ka jingthungkam kala jia 15 snem mynshuwa. Kine ki Nongtrei ki don ia ka hok ban kam ia ka jingthungkam pura kumba long ia kiwei pat kiba hashuwa jong ki”.
“Namar kata, ngi dawa ba ia ka jingshakri jong kine ki nongtrei dei ban pynskhem pura noh bad ka Sorkar ka dei ban sangeh syndon ban pyndik ia ki” ula ong.
Ha kajuh ka por, ka VPP kala kyntu ia ka Sorkar ban pynkut noh syndon ia ka jingthungkam adhoc kaba long pyrshah ia ki rule ka Sorkar hadien habud bad ban tynrong ia ka jingkitkhlieh ha ki Ophisar ba leh tam.
Hynrei, haba phai pat sha KHADC, ka VPP mar syn thaw ia ka Executive Committee, kala weng kam bad pynhiar kyrdan biang ia palat 30 ngut ki nongtrei adhoc kiba la shah thungkam pura ha ka Executive Committee kaba la leit noh.
Kine ki Nongtrei ba shah ktah ha ka hukum jong ka Executive Committee ka VPP, kila tied ia ka jingkhang jong ka Iingkashari Meghalaya High Court, kaba la pynmih ia ka hukum ba shipor, ba dei ban pynsangeh shuwa ia ki hukum jong ka Council pyrshah ia kine ki Nongtrei.
Kane ka mukotduma halor kane ka hukum ka EC ka VPP ka dang don hapdeng ka jingbishar ka Iingkashari haduh mynta.
Kat kum ka dorkhas ka VPP sha u Myntri Rangbah la pynpaw ba ka VPP ka ieng skhem halor ka nongrim jong ka Ain, ka jingtreikam kaba shai, ka jingbahkhlieh, jinglah treikam bha ki bor treikam bad ka hok ki Nongtrei.
Namar kata, ka jingkylli kala mih ban hap thew tarajur ia kiei kiei baroh.
