Shillong: Ka Rongbiria Seng Kut Snem, ka Seng Khasi Kmie, Mawkhar, Shillong, ba la pynïaid da ka Rongbiria Committee, , ka la long kaba iphuh iphieng da ka jingwan ban ïashim bynta shit rhem ki rangbiria na ki dong ki thaiñ ka sor bad khap sor bad na ki shnong kiba kham jngai, hynnin ka sngi Ïew Rynghep, ha madan Second Ground, Polo.
Ha ka jingïakob siat kynhun, ki rangbiria ba la mih madan ban ïakhun baroh ki long 82 kynhun katba ha ka jingïakob kaba para marwei, ki rangbiria, kiba la mih madan ba kin ïakhun ki long haduh 218 ngut.
Mynta ka snem, ka jingpynlong ïa kane ka rongbiria, ka long kaba kham kyrpang, namar ka dei artad ha ka snem, kaba kum ka seng, ka rakhe ïa ka lyngkhuh snem kaba 125 snem, ka jingseng ïa ka Seng Khasi.
Ha kaba kut jong ka jingïakhun, ha ka ïakob siat kynhun, ka nam lahduh ka leit sha ka kynhun ba arngut ki rangbiria napoh ka shnong Sohra Rim hadien ba ki la lah ban pynliem noh ïa ka kynhun ba arngut ki rangbiria ka Laitkyrhong Ïahunlang ‘A”.
Katba ha ka jingïakob siat kaba para marwei, u rangbiria ba la leit phai sha la ïing ryngkat ka nam lahduh dei u bah Decklan Lynrah na Umpling, ba wan ba-ar dei u J. Sohshang na Pynthor bad uba wan ba lai dei u Shemborlang Sawkmie na Tyrsad.
Kumba ka juh long, ha shwa ban sdang ïa kane ka rongbiria ka la don shwa ka jingkyntiew ïa ka lama jong ka seng da u Rgh O. Pyngrope President Seng Khasi Kmie, ka nguh ka dem kaba la pyndep da u Riew Tymmen Riewsan u Rgh Skor Jala, ha kaba la wan ban sakhi lang da u Rgh Hainess Marbaniang General Secretary Seng Khasi Khasi Kmie, Bah Danny Pariat Secretary Shillong Recreation Ground Trust, ki dkhot ka Jylli Pyrkhat Kam (JPK) Seng Khasi Kmie bad kiwei kiwei.
Ha ka por janmiet jong ka jingïakhun ïa ki phainal, u kongsan ba la wan ban ïa don lang dei u Bah Wailadmiki Shylla, myntri ba dei khmih ïa ka tnat Sports & Youth Affairs, Kong Matsiewdor War Nongbri Commissioner & Secretary jong ka sorkar jylla, ki dkhot nongkit kam ka JPK bad Seng Kynthei ka Seng Khasi Kmie bad kiwei kiwei.
