Shillong, Lber 06 : U President ka United Democratic Party (UDP) Bah Metbah Lyngdoh hynne ka sngi nyngkong, ula ong ba ka rai jong ka UDP ban kyrshan ia ka Sorkar ba ialam da ka National People’s Party (NPP) ka long eh na ka bynta ban pynthikna ia ka jingskhem ka Sorkar.
Haba iakren bad ki nongthoh khubor, u Bah Metbah ula ong ba ka ong kaba bakla na ka liang u President ka Voice of the People’s Party (VPP) Bah Ardent M Basaiawmoit ban kynnoh ba ka UDP kala leh ia ka drama politic.
“Ngam wan hangne kum u President ka Party ban leh drama. Ngam pat ju leh ia kino kino ki drama ban pynbiej ia ki paidbah bad ngan ym leh ruh ia kata hadien habud ruh kumjuh. Kane nga kren shai na ka liang ka jong nga” ula ong.
U Bah Metbah ula ong ba ka jingpyrshang ban thaw ia kawei pat ka sorkar (bym don NPP bad BJP) kam shym la urlong satia namar 3 nut na ki MLA ba kynthup ia arngut ki MLA ka UDP bad uwei u MLA shimet kila rai ban leit kyrshan ia ka Sorkar ba ialam da ka NPP.
“Ha katei ka sngi hadien ba ngi iohi ia ka rai u paidbah, ngi sngew ia ka jingmih ka sur kaba mih ba ka UDP ka dei ban ialam ha kaban thaw ia ka Sorkar. Ha kane kajuh ka sngi, ngi la don haduh 30 ngut ki MLA, kaba mut ba ngi lah ban leit kam ia ka jingbun paid. Hynrei ha ka por janmiet, ngi tip ba 3 ngut kila jah rngai bad ngi la kut da 27 ngut. Namar kata, kumno ngin leit kam da tang 27 ngut katba kawei pat ka liang kala don 32 ngut” ula ong.
Une u Nongialam ka UDP ula pyntip ruh ba ka kynhun kala ap jan arsngi hadien ba u President jong kawei ka Party ula kular ban wanrah biang ia ki MLA hynrei kane kam shym la seisoh satia.
“Bad ngi lah ioh khubor na kawei ka Liang jong ka kynhun ba ki kwah ia ngi ban iadonlang ha ka Sorkar. Namar ngi shem ba ngim don ia u nombor, kumta ngi la rai ban leit ban iasoh (sorkar NPP)” ula ong.
Une u Lamphang barim ka Iingdorbar ula ong ba ka UDP kam shym la dawa satia ia ka shuki Symbud Myntri Rangbah bad bynrap “Hynrei ka jingiakren ka dang iaid halor ki jingiapynbeit baroh”.
