Nongpoh, Lber 06: Ka Synjuk ki Rangbah Shnong Ri Bhoi District hynne ka sngi nyngkong, ka la pynpaw ia ka jingangnud ba ka Sorkar MDA-2 ba ialam da ka National People’s Party (NPP), kan ai bhah shuki Myntri Sorkar lem ia ka Ri-Bhoi District.
Ka National People’s Party (NPP) kala ioh 2 ngut ki MLA na Ri-Bhoi District na ka 5 ngut bad kine ki dei u Bah Sosthenes Sohtun, MLA ka Jirang bad u Bah Damanbait Lamare MLA ka Umroi.
Kumjuh ruh u MLA ka Nongpoh uba dei na ka United Democratic Party (UDP), Bah Mayralborn Syiem, u dei uba iadonlang ha ka Sorkar MDA-2.
Haba kren bad ki Nongthoh Khubor, u President ka Synjuk Bah Banbuhai Makdoh bad General Secretary Bah PB Sylliang ki la ong ba 3 ngut na ki MLA ka Ri-Bhoi District ki dei kiba iadon ha ka Sorkar khamtam arngut kiba dei na ka NPP.
“Ka District ka donkam ban don uwei u Myntri ha ka Sorkar Jylla ba un lah ban leh shibun kiei kiei na ka bynta ka bit ka biang bad ka jingmyntoi jong ka District baroh kawei” kila ong.
Ha kajuh ka por, ka Synjuk kala ai khublei ia baroh 5 ngut ki MLA kiba dang shu shah jied thymmai ha ki paidbah haba pynpaw ia ka jingkyrshem kaba skhem ba baroh kine ki MLA kin ai ia ka jingshakri bad ka jinglen lade na ka bynta ka bha ka miat jong ka District bad baroh ki 5 tylli ki constituency.
