Shillong, Jymmang 18 : Ka Nongkseh SSCC ka la lah kiew sha ka kyrdan kaba halor duh jong ka Group A da ka jinglah ban pynliem ia ka Shillong Lajong FC da 2-1 kol ha ka jingiakhun quarterfinal league ka 5th Meghalaya State League ba long ha ka janmiet sngi Nyngkong ha madan ka SSA Stadium, First Ground, Polo.
Ia ki kol ba kordor tam ka kynhun ialehkai ka Nongkseh SSCC la thep da u Sheen Sohktung (67’) bad u Mebankhraw Wahlang (69’).
Shwa kane ka jingiakhun, ka Mawlai SC ka la khur ia ka nam jop ba nyngkong eh ha kane ka kyrdan iakhun quarterfinal hadien ba ka la lah ban pynliem ia ka Rangdajied United Fc da 2-1 kol.
Haba phai biang sha ka jingiakhun hapdeng ka Nongkseh bad ka Lajong, ka stadium kala dap smam da ki nongkyrshan na baroh arliang, katba hapdeng ka madan pat ki ar kynhun ki sngap kila iasei lut iala ki ktang lyer bad ka sap ban nion shakhmat ia la ka rukom ialehkai.
Ha ka jingwan bteng ia ka kylla miet, ka Nongkseh ka la sdang ban ialehkai kham pher, ha kaba ki la sdang ban kham nion bha ha ka rukom ialehkai ka jong ki, kaba hangne ka pynlong syndon ia u Sheen bad Mebankhraw ba tang hapdeng ki khyndiat minit, ba kin ioh ba kin thep ia kitei ki kol ba kordor tam naka bynta ka kynhun, kiba la pynsawa jam ia ka sur kynjoi na ki paid nongkyrshan.
Ha kaba kut ka jingiakhun, ka Nongkseh kala ioh khur mynta 7 point na ki lai sien ialehkai, katba ka Lajong ka don ha ka kyrdan kaba ar hadien ba ka la ioh khur 6 point bad kane ka namrem ka pynkut syndon ia ka jingjop ba 9 sien lynter jong ka kynhun.
Ka khubor na ka jingiakhun kaba la long ha ka por mynsngi, ka Mawlai SC kala ioh ban thep iaki kol lyngba u Basuklang Bina (39′) bad Kevin Rymbai (61′), katba ka shi kol ka Rangdajied United FC ka la wan haka dur jong ka penalty ba la shut da u Mebannangkiew Thabah (45’+1).
Da kane ka jingjop, ka Mawlai ka la lah ba kan khur 4 point na ki lai sien ialehkai ba ka la dep katba ka Rangdajied kam pat lah ban ioh khur point, ha ki lai sien iakhun ba la dep.
Lashai ka sngi ka jingiakhun ka Group B ka long hapdeng ka Nangkiew Irat FC pyrshah ia ka Langsning FC kaban long ha ka por 2 baje nohphai sngi bad ha ka por 6:00 baje janmiet ka Maram FC kan iakhun pyrshah ia ka Rymbai Shkenshynriah SC.
