Shillong, Jymmang 18: Ki Pulit ka EKH ha ka sngi Nyngkong, kila leit khlong biang ia ka met ba sah jong u Trophimos Khongmawdoh, uba la iap na ka jingkynnoh shah bom ha u Rangbah Shnong Pynter bad ki dkhot ka Village Defence Party (VDP), iathuh u Superintendent of Police ka East Khasi Hills Bah Vivek Syiem haba pyntip ba ka mukotduma mynta ka shong ha ka kaiphod jong ka Post Mortem.
“La dei ban khlong biang iaka met haka 15 tarik hynrei namar ka jingbym biang ka suinbneng, la leit ban khlong noh mynta ka sngi” ong u Bah Vivek.
U Bah Vivek u pyntip “Ia ka post mortem ruh lah pyndep hi ha katei ka jaka. Ngin ap mynta ia ka kaiphod jong ka post mortem ban pynthikna la ka dei ba u shah pyniap ne u iap namar ka jingleh hi”.
La tep ia u Trophimos ha ka 7 tarik Iaiong bad u SP ula pynthikna baka met kala pyut.
“Hooid, ka met ka la pyut lah tep ia u naduh ka 7 tarik Iaiong” ong u Bah Vivek “Hynrei to ngin kyrmen ba ngin lap ksai ia ka daw jong ka jingiap.”
Ula ong ba ka kaiphod jong ka Post Mortem kan plie lynti iaki Pulit ban shim iaki sienjam jong ka ain.
“Hadien kata ngin sa shim ia ka rai, hato ngin leit sha ka iingbishar ban pyndam noh ia ka jamin bad haka juh ka por ngin pynkhreh ban kem iaki ba shah kynnoh” u la ong.
Halor ka jingkynnoh shah thombor, u SP u la ong ba ki Pulit kin hap ap iaka Post Mortem ban pynthikna iaka dawa jong ka jingiap.
“Ka long ka jingshisha ba don ka jingshah thombor kaba la jia namar ka jingïakynad kaba la jia ha ïing, ha kaba ki dkhot VDP bad Rangbah Shnong ki hap ban tuklar” u la ong.
“Hynrei ban pynthikna, la ka jingshah thombor ka dei ka daw jong ka jingïap, ne u iap hi, kata kan sa paw shai hadien ba la mih ka kaiphod jong ka Post Mortem”.
Ki Pulit ki dang bishar bniah mynta ia ka Video bad ki nongsakhi. “Baroh ki angle jong kane ka Case naduh ka video, ki briew kiba la don hangta, ngi dang pyrshang ban pynthikna shaphang kane ka Case bad hadien kata ngin tip shai, la kine ki briew ki donkti ne em” ula ong.
Haduh mynta, 11 ngut ki briew ki la ioh jamin lypa. “11 ngut ki briew ki la shim jamin lypa, kata ka mut ka jingdonkti jong ki ka don hangta” u la ong.
Ki pulit ki dang kylli bniah ruh naki nongsakhi, kiba marjan, bad kiba don ha katei ka jaka. “Kiwei pat ki nongsakhi ne kiba la don ha katei ka jaka, ngi pyrshang ban pynthikna ia kata namar ba ki kylla long ki sakhi laitluid ia katei ka Case”.
Lah ban kdew ba u kpa jong une u rangbah u bah Netnobiweit Khongsdoh u la ujor daka ejahar ha ka 5 tarik Jymmang da kaba kynnoh ba u khun jong u, ula shah thombor ha u Rangbah Shnong bad ki dkhot ka VDP.
