Shillong, May 20: Ka Nongkseh SSCC bad ka Shillong Lajong FC kila pyni ia ka jingialehkai kaba itynnad bad iabiang bor bha ha ka sngi Balang, kaba la kut ha ka jingiakhaid ba mar 1-1 kol ha ka jingiakhun quarter final second leg jong ka Group A ka 5th Meghalaya State League kaba la long ha SSA Stadium.
Ka Nongkseh SC kala la pynliem ia ka Shillong Lajong da 2-0 kol ha ka jingiakhun first leg hynrei haba wan phai pat sha ka second leg, ka jingiakhun hapdeng kiine ki club ba radbah kala pyni ia kawei pat ka jingialehkai kaba itynnad na kaba itynnad tam jong kane ka lympung ha kane ka aiom ba mynta, kaba la pynshongshit shikatdei eh ia ki nongkyrshan jong baroh arliang.
Ka Nongkseh kala ioh thep nyngkong ia ka kol ha ka minit kaba 33 da u Mebankhraw Wahlang lyngba ka jingshut u Hardy Cliff Nongbri ia ka bol na ka Corner Kick.
Hynrei ha ka minit kaba 37 ka Lajong kala ioh ban pyniakhaid lyngba u Fridison Wanniang da kaba ioh ban pynrung ia ka bol napoh ki kjat jong u nongap kol ka Nongkseh u Guidle Syiemlieh.
Watla kine ki artylli ki kynhun kila pynkut ia ka jingiakhun da ka jingiakhaid hynrei kila pynlong pat ia kitei baroh arsien ki jingiakhun ki jongki kum ka jingiakhun kaba iahap kum ka final.
Ha kawei pat ka jingiakhun, ka Mawlai SC kala ioh ban pynliem da 4-0 ia ka Rangdajied United FC. Ka Rangdajied kala mad ia ka jingshah rem kaba 4 sien lynter bad kane kala pynkut noh shi syndon ia ka jingthmu ban ioh rung sha ka Semifinal watla kane ka kynhun ialehkai kala iohrah ia ka nam Champion ha u snem 2023 bad ka dang don sa artylli ki jingiakhun kiba dang sah ban ialehkai.
Ka Mawlai kala ioh thep ia kitei ki 4 kol lyngba u Basuklang Bina ha ka minit kaba 14 bad 39, u Fairming Suting ha ka minit kaba 66 bad u Samlang Rympei ula thep ia ka kol ha ka minit kaba 90’+4.
Kane ka jingjop kala pynthikna ia ka Mawlai ba kan long ka kynhun kaba don ha ka kyrdan kaba shakhmat ha ka Group B.
U Basuklang ula iai bteng ban ioh thep kol bad ki ar tylli ki kol kiba ula ioh thep kila pynlong ia u kum u nongialehkai ka Mawlai ban thep bun kol tam ha ka MSL da kaba ioh thep 6 kol.
Kumba long mynta, ka Nongkseh kala wan nyngkong da kaba ioh 8 point,ka Lajong kala wan baar da kaba ioh 7 point, ka Mawlai kala wan balai da kaba ioh 7 point bad ka Rangdajied kam pat shim la ioh point eiei ruh em.
Ka SLFC ka don ia ka kabu kaba kham biang bha ban ia ka Mawlai, kumta kala pynlong ia ka ban don ha ka kyrdan ka baar kumba long ia mynta hi.
Lashai ka sngi ka jingiakhun ha ka Group B kan jam sha ka wat ka baar, ha kaba ka Rymbai Shkenshynriah SC kan iakhun pyrshah ia ka Maram FC ha ka por 2 baje mynsngi.
Ka Shkenshynriah kala jop ia ka jingiakhun ha ka wat kaba nyngkong da 4-2 kaba la long ha ka sngi Baar.
Ka Langsning FC kan iakhun pyrshah ia ka Nangkiew Irat SC ha ka por 6 baje janmiet bad ka Nangkiew kan hap ban iakhun tyngeh khamtam haba kala shah pynrem da 6-1 ha ka jingiakhun ha ka wat kaba nyngkong
