Tura, K’lyngkot 13: Hadien ka jingshah rem ha ka jingiakhun ba nyngkong jong ka Meghalaya Games 2024 ha ka sngi Palei, ka kynhun ialehkai phutbol ki shynrang U-18 ka West Garo Hills kala ioh mynsiem pat da ka jingjop ia ka South West Khasi Hills da 5-0 kol ha ka jingiakhun hynne ka sngi saitjain.
Ka South West Khasi Hills kala ialehkai bha da ka jingkyrmen ban iohthep kol hynrei ki rang ialehkai ba shadien jong ka kynhun ka West Garo Hills kila iada dohiap khlem da ailad satia ban wan tur haduh ba ka SWKH kala duh thiaw ban thep kol.
Ka South West Khasi Hills kala jop ia ka jingiakhun ba nyngkong pyrshah ia ka South Garo Hills da 6-1 kol ha ka jingiakhun ba long ha ka sngi Palei.
Sa kawei ka jingjop kan pynthikna ia ka kynhun ban ioh jaka ha ka semi phainal hynrei mynta kan hap ap ia ka jingiakhun jong ka WGH pyrshah ia ka SGH bad ruh ia ka jingiapher ha ka jingiohthep kol.
Ka WGH ruh kala phai khmat ban ioh rung sha ka semi phainal bad kan iakhun dohiap ban jop kput ia ka SGH.
