Churachandpur, Nailar 21: Ka jingpang ba khyllah la suba ba kala lynshop ha ka shnong Bopi kaba hap hapoh ka distrik Churachandpur, Manipur, ha kaba kumba 40 haduh 50 ngut ki briew ki la kem pang kaba pyni ia ki dak ki shin ba kynthup ia ka jingshit met, jyrhoh, khta khlieh bad pynhiar kpoh ha ka taiew ba ladep.
U Chief Medical Officer ka Churachandpur u Dr Neng Mate u la ïathuh ba ka tnad ka koit ka khiah ka la ïoh pdiang ïa ka shithi na ka bor pynïaid shnong Bopi ha ka 19 tarik u Nailar ba la pyntip halor kane ka jingsuba ba don kane ka jingpang.
Hadien kane ka report, la phah ïa ka kynhun ki nongsumar na Thanlon Primary Health Centre (PHC) kaba dei ka jaka ai jingsumar kaba jan eh bad katei ka shnong ha ka sngi Thohdieng ban peit bniah ïa ka jinglong jingman.
“Ïa kane ka kynhun la phah ban leh ïa ka Clinical Assessment mardor ïa ki briew kiba la shah ktah bad ban pynkhreh ruh ïa ka line list jong baroh kiba suba don ïa kane ka jingpang,” ong u Dr Mate.
Ka kynhun kan wad bniah ruh ïa ka daw bad ka tynrai jong kane ka jingpang bad ban ai ka jingsumar kaba donkam ïa kito kiba shah ktah.
Ki heh ka koit ka khiah kin sa bishar bniah ïa ka jinglong jingman bad pyntreikam ïa ki lad jingïada bad jingpynïaid kiba biang, lada donkam, ban tehlakam ïa ka jingsaphriang jong ka jingpang ba la suba.
Ki heh sorkar kim pat lah ban pynthikna ia ka jinglong ne ka daw kaba thikna jong kane ka jingpang.
