Nongpoh, Nailar 21 : Ka bor pyniaid district ka Ri-Bhoi kala bthah ia ki nongleit nongwan ba kin kiar ban iaid na ka surok Byrnihat-Jorabat namar ka jingpakhang ia ka surok na baroh arliang na ka daw ka jingiapyni bor hapdeng ki nongniah kali tourist ka Assam-Meghalaya.
Ha ka jingbthah paidbah bala pynmih ha ka sngi Thohdieng, u Deputy Commissioner Dr Abhishek Saini ula ong ba dei ban kiar shuwa ban iaid na kane ka surok tad haduh da pynbna da kumwei pat, khamtam ki riew kiba leit phah sumar, leit sha kad liengsuin, sha railway station ban leit jingleit bad kiwei ki jingdonkam ba kyrkieh.
TRAFFIC ADVISORY: The Byrnihat–Jorabat road is presently blocked from both sides. Given the situation, passengers traveling for health-related purposes, airport and railway travel, and other essential emergencies are requested to avoid the Byrnihat–Jorabat route until further… pic.twitter.com/3Vzby6pXBy
— Meghalaya Tourism (@meghtourism) August 21, 2026
Ka bor district kala ai jingmut ban pyndonkam da kiwei pat ki lynti iaid kiba pyniasoh hapdeng ka Meghalaya bad Guwahati.
Ia ki nongleit jingleit na Shillong, Nongpoh bad Byrnihat sha Guwahati Airport bad Raiway Station, ki bor district kila ai jingmut ban iaid la ka long na ka surok Byrnihat-Pillingkata-Kiling lane na Nongpoh-Patharkhmah-Rani.
Ia ki nongleit nongwan kiba wan na Guwahati Airport lane Railway Station sha Shillong, la ai jingmut ba kin pyndonkam ia ka surok Basistha-Pillingkata-Killing lane ka surok Rani-Patharkhmah-Mairang.
Ka jingbthah kala kyntu ruh ia ki nongleit nongwan ba kin da pyrkhat bha ia ka leit ka wwan jong ki bad ban iatreilang bad ki bor Sorkar khnang ban pynthikna ia ka leit ka wan ba khlem jingshah pynthut.
Kane ka jingbthah kala mih hadien ba nang jur ka jingiapyni bor hapdeng ki nongniah kali tourist na Assam bad Meghalaya, kiba la iakhang mar kylliang ia ki kali na baroh arliang ba kin iarung sha ki Jylla jong ki.
Ka bor district ka Ri-Bhoi kala bthah ia baroh ki paidbah ba kin kiar ban iaid na surok Jorabat-Byrnihat la ki dei kiba hiar na Meghalaya ne kiba wan na Assam bad ban pyndonkam ia ki lynti kaba kdew haneng tad haduh da pynbna da kumwei pat.
