Imphal, Nailur 26 : Da ki hajar ngut ki samla pule ha Imphal kila iamih sha surok ban pynlong ia ka jingiakhih paidbah ban pyrshah ia ka jingpyniap dusmon ia ki arngut ki samla pule Meitei, kiba shah rahbor ha ki kynhun kaikhlaw Kuki.
Kine ki samla pule kila dawa ia ka jingbishar kaba hok ia kine ki lanot, kiba la shah rahbor ha ka kynhun ki kaikhlaw Kuki naduh ka 6 tarik u Naitung.
Ki Samla Pule kila pyrshang ruh ban iatur paidbah sha ka Iingsah u Myntri Rangbah ka Jylla N Biren Singh hynrei ki bor pahara kila khang lynti bad kila siat ruh da ki tbomb tyndong lyer pynsat khmat ban pynphriang ia u paidbhur.
Ha kane ka jingiakhih, bun ngut ki samla kila mynsaw bad la pynkit mar mar ia ki sha Hospital ban ai jingsumar.
Kane ka jingkhynwin kala mih hadien ba ki dor jong ki metiap ki arngut ki samla ba shah rahbor, kila saphriang ha ki rynsan social media tang mar syn weng noh ia ka hukum khang Internet.
Arngut ki samla pule na Manipur, kila jah rngai ha ka 6 tarik Naitung ha ka por ba dang jur bha ka jingiaumsnam hapoh ka Jylla.
Ki dur jong kine ki samla kala saphriang ha ki social media ha ka sngi Nyngkong. Kawei ka dur ka pyni ia kine ki arngut ba ki shong ha phlang ha ryngkat ki riew kiengatiar bad kawei pat ka dei ka metiap jong ki, kaba la thiah lyngktar ha madan.
Ha kajuh ka por, ka Sorkar Manipur kala kyntu ia ki paidbah ba kin kiar na ka jingpynmih ia kano kano ka huri hura bad ban ailad ia ki bor khmih ba kin tohkit ia ka jingrahbor bad jingpyniap ia kine ki arngut.
Ka Chief Minister Secretariat hynnin ka miet kala pyntip ba ka Sorkar Jylla kala aiti ia kane ka case sha ka Central Bureau of Investigation (CBI) ba kan tohkit.
