Guwahati, Lber 24: U Myntri Rangbah ka Assam Himanta Biswa Sarma u la ong ba man ki elekshon ki long kiba kongsan bha na ka bynta ka jingim bad ka jing iada ia ka jinglong tynrai jong ki trai ri trai muluk jong ka jylla.
Haba kren ha ki nongthoh khubor hadien ka Jan Ashirwad Yatra ha Sorbhog-Bhawanipur constituency, u Sarma u la ong, “Man la ka elekshon ka long kaba kongsan na ka bynta ki trai ri trai muluk ka Assam namar ngi hap ban im bad ban iada ia la ka jong ka jinglong tynrai.”
Haba pynpaw ïa ka jingsngew skhem ha shwa ka elekshon, u la bynrap,”Ki briew ki pynsleh ïa ngi da ka jingieid bad ki mih paidbah ban kyrshan ïa ngi.Ngi sngewskhem ban jop ïa baroh ki constituency.Ngi la iehnoh ïa ka constituency Bajali na ka bynta u paralok ba ïatreilang jong ngi, ka AGP.”
U Sarma u la pyntip ba ka Jan Ashirwad Yatra kut noh ha ka sngi Ba-ar, kaba la kynthup lang kumba 2,000 km ha kylleng ki 40 tylli ki Assembly constituencies ha Assam.
“Naduh lashai ka sngi kan sdang ka Vijay Sankalp Sabha, ha kane ka Yatra ngi la ioh ia ka jingkyrshan kaba khraw na ki paidbah”, u la ong.
U myntri rangbah ka jylla u la ialap elekshon ruh ia u kyrtong ka BJP u Ranjit Kumar Dass ha Sorbhog-Bhawanipur.
Ha kane ka jingïalap elekshon, u Sarma u la sam ïa ki chips kiba la shna hi ha Assam ‘Made in Assam’ ba la pynmih na la ka jong ka ri hapdeng ki nongkyrshan.Haba kdew ïa ki jingbam kum ki “bhagin”, u la pynpaw ïa ka jingdonkam ban kyntiew ïa ki mar rep bad ka jingseng kam seng jam.
Ka jingleh, kaba khleh lang ka jingsarong ha ka kolshor bad ka jingïaid lynti ha ka saiñ hima sima, ka la khring ïa ka jingmut jingpyrkhat ki paidbah kaba kongsan bad ka la pyndap ïa ka jingsngewtynnad kaba don sawdong jong ka jingïalap.
