Shillong, Risaw 13: Ka Early Childhood Development (ECD) Programme ka Meghalaya kala lah ban pyninam kum ka nuksa ba lah ban bud da kiwei ha ka National Women and Child Development Conference bad ka Prime Minister’s Office ka la bthah ia ka jylla ba kan pyni hakhmat jong u Myntri Rangbahduh ka ri Narendra Modi, iathuh u Myntri Rangbah ka Jylla u Conrad K Sangma ha ka sngi Baar.
U Sangma ula iathuh ia ki nongpathai khubor, ba ula leit ban iashimbynta ha ka National Conference ka baar sngi kaba la lum lang ia ki Myntri Sorkar kiba khmih ia ka WCD na kylleng ki jylla jong ka ri.
“U Myntri Rangbahduh ka ri ula donlang ha ka jingpynkut ia kane ka jingialang. Kadei ka prokram kaba ar sngi ha kaba ki Myntri Sorkar kiba khmih ia ka Tnad Social Welfare kila iakren ia ki rukom leh kiba biang tam ban pyntreikam ia ki Scheme jong ka Sorkar Pdeng bad ki Sorkar Jylla. Kadei ka lynti kaba khraw ban sngewthuh bad ioh jingshai na kiwei pat” ula ong.
“Ngi sngewkmen shibun ban ioh burom namar ba ka ophis jong u Prime Minister kala bthah ia ka Jylla Meghalaya ban pyni ia katei ka ‘Model’ jong ka Early Childhood Development kaba nga lah pyni ia u Myntri Rangbahduh ka ri hakhmat jong ki 35-40 ngut ki briew bad baroh ki myntri Sorkar kila ia don lut” ula ong.
Ula ong, ba ka Meghalaya kadei ka jylla kaba nyngkong eh ban pyntreikam ia ka ECD, u Sangma ula ong, ba ka jylla kala rah ia kane kum ka Model hapoh ka ri.
“Ngi lah pyni ia ki jingshisha katkum ka jingstad saïan ba 85% ka jingroi ka jabieng jong ki khunlung ka roi hapoh jong ka 6 snem ka rta bad kumta da kaba bei tyngka ha katei ka rta ka long kaba kongsan bha, khamtam da kaba buh hakhmat ia ka jingiohi jngai jong u Myntri Rangbahduh ka ri halor ka Viksit Bharat” ula ong.
Ula ong, ba ha katei ka jingialang la iatai sani ha kaba iadei bad ki Anganwadi.
“Ngi lah iakren kumno ba ki Anganwadi ki lah ban long ki Centre na ki Nutritional Centre sha ki Centre kaba ki heprit kin lah ban pule bad kumno ki kmie ki kpa, ophisar bad ki nongtrei Anganwadi ki lah ban iatreilang ban pynlong ia ka Nutritional Centre sha ka Centre jong ka jingpule, ka Centre kaba dap ia ka jingkmen bad ka Centre kaba ka imlang sahlang ki lah ban wanlang hajuh” ula ong.
U Sangma ula ong, ba u Myntri Rangbahduh ka ri haba kren ha ka jingialang ula btin ia ki jylla ban trei bun bad kham paka ha ki shnong ki thaw ban buh hakhmat eh ia ka koit ka khiah jong ki khunlung bad ka kmie.
Ha kawei pat ka liang, ha ka jingiakynduh ia Ambassador ka Panama, u Conrad Sangma ula ong “Nga lah ioh ban iakynduh tang khyndiat por ia u Ambassador ka Panama. Ki lah sam ia ki buit ban wad ia ki lad, ha kaba ka Meghalaya bad Panama ki lah ban iatreilang, la ha ka jingsam markylliang ia ka kolshor ne ki kam khaii pateng kiba rit ha ki jaka kaba ki don ia ka jingshemphang bad kaba ki don ruh ia ki riewshemphang”.
Ula pyntip ba ula shah khot sngewbha kum u kongsan, ha ka jingrakhe ka Panama ia ka Independence Day ha Delhi ha ka 28 tarik u Naiwieng.
“Nga sngewnguh shibun ia u Ambassador ka Panama halor katei bad nga khmih nangne shakhmat ia ka jingiadei kaba bha ba miat na ka bynta jingbit jingbiang jong ka Meghalaya-India bad Panama” ula bynrap.
