Shillong, Nailur 13: U Lamphang ka Iingdorbar Thaw Ain Bah Metbah Lyngdoh hynne ka sngi ba-ar ula byrngem ban leh da kaba tyngeh pyrshah ia u MLA ka Bambegre Saleng A Sangma lada u dang iai pynmih ia ka ktiensih hapoh ka Iingdorbar.
“Nga la shimkhia ia ki jingkren jong u Dkhot (Saleng) bad nangne shakhmat ka Iing kan leh da kaba tyngeh ia une u Dkhot lada u dang iai pynmih biang ia ka ktien sih hadien habud. Kane ka dei ka rai jong nga” ong u Bah Metbah.
Hynnin ka sngi nyngkong, u Lamphang ula hukum ban weng noh ia ka kyntien ktiensih bala pynmih da u Saleng haba ia shimbynta ha ka jingiatai ba lyngkot halor ka jingsniew ki surok, ka jingdheng kali bad ka jingbym burom ia ki ain niah kali ha Jylla naka jingbuh jingthoh (proceeding) jong ka Iing.
Hashuwa ban pynbna ia kane ka hukum, u Bah Metbah ula ong ba kane kam dei satia ka sien ba nyngkong ba u Dkhot ka Iing (Saleng) un pynmih ia ka ktien sih bad ba u hap ban pynmih ia ka hukum ban weng ia kine ki kyntien naka jingbuh jingthoh jong ka Iing ha kiba bun ki khep.
