Itanagar, Nailur 13: Ki pulit ka Arunachal Pradesh kila ioh ban pyllait im ia sawngut ki khynnah kynthei kiba dang rit napoh kawei ka jaka sahmiet (lodge) ha Guwahati, ong ka khubor heh pulit hynnin ka sngi Nyngkong.
Katkum ka khubor pulit la iathuh ba ka kynhun ki pulit na Arunachal Pradesh ha ryngkat ki pulit ka Assam kila ioh ban pyllait im ia kine ki khynnah rit napoh kawei ka jaka sahmiet na ka sorbah Guwahati ha kane ka sngi U Blei ba la lah.
Na ka liang ki pulit kila kem noh ia kawei ka longkmie halor ka jingkynnoh donkti halor kane ka jingjia, ong u heh pulit.
Ha ka 8 tarik mynta u bnai, ki pulit na Diyun Police Station kaba hapoh Changlang district ka Arunachal kila ioh pdiang ia ka jingujor halor ka jingdon jong ki sawngut ki khynnah kynthei ba dang rit kiba la jah rngai noh na ki bynta jong ka thain Manabhum.
Kumta halor kane ka jingujor, ki pulit ka Arunachal kila pynlong ka jingtohkit bad lapdien ia ka jaka kaba kitei ki khynnah ki don, ong shuh shuh u heh pulit.
Kumta ruh na ka liang u SP ka Changland, u Mihin Gambo ha ryngkat u DIGP ka Assam u Prasanta Changmai nalor u DCP ka Dispur u Sudhakar Singh kila shimkhia mardor halor katei ka jingjia tad haduh ba kin da lapdien ia ki.
Hadien ba la pyndep ia ki jingdonkam baroh, ia kine ki khynnah kynthei la aiti noh sha la ki jong kiba haiing hasem lyngba ka tnat Child Welfare Committee jong ka Changlang, ong u heh pulit.
